Datganiadau i'r Wasg
Lansio penwythnos crefftau newydd yn Sain Ffagan Amgueddfa Werin Cymru
Dyddiad:
2019-06-10Cynhelir penwythnos crefftau newydd sbon yn Sain Ffagan Amgueddfa Werin Cymru ar 15 ac 16 Mehefin. Ymunwch â’r hwyl wrth i’r Amgueddfa gynnal arddangosiadau, dosbarthiadau a gweithgareddau i’r teulu cyfan.
Cynhelir penwythnos crefftau newydd sbon yn Sain Ffagan Amgueddfa Werin Cymru ar 15 ac 16 Mehefin. Ymunwch â’r hwyl wrth i’r Amgueddfa gynnal arddangosiadau, dosbarthiadau a gweithgareddau i’r teulu cyfan.
Mae crefftau a chreu wrth galon Sain Ffagan a’r casgliadau. Mae orielau’r Amgueddfa yn llawn o wrthrychau a wnaed â llaw – rhai ohonynt dros 200,000 o flynyddoedd oed.
Dewch i weld crefftwyr o fri yn arddangos eu sgiliau, gan gynnwys gof, gwehydd, melinydd a chlocsiwr yr Amgueddfa. Bydd pob math o grefftau i’w gweld, wrth i arbenigwyr arddangos sgiliau traddodiadol fel hollti llechi, creu basgedi a chneifio.
Dewch i ddysgu sgil newydd yn ein dosbarthiadau meistr. Mae’r sesiynau dwy awr hyn, dan arweiniad arbenigwr cyfeillgar, yn ffordd wych o roi cynnig ar grefft newydd. Dewiswch o’r canlynol: cerfio pren, croesbwytho, naddu fflint, a llawer mwy.
Gall crefftwyr ifanc alw heibio un o’n sesiynau gweithgaredd i’r teulu. Bydd cyfle i wneud potyn, creu coronbleth, a llawer mwy.
Dewch i gael eich ysbrydoli gan grefftau traddodiadol yn Gweithdy, cyn rhoi cynnig arni eich hun.
Dywedodd Bernice Parker, Swyddog Digwyddiadau:
“Mae’n bleser lansio penwythnos crefftau cyntaf Sain Ffagan. Ym mis Hydref 2018 agorwyd Gweithdy, oriel bwrpasol sy’n dathlu sgiliau cenedlaethau o grefftwyr. Rydym yn edrych ymlaen at ddod â’r Amgueddfa’n fyw gyda gweithgareddau ac arddangosiadau ar draws y safle.
“Rydym yn lansio rhaglen newydd o gyrsiau crefft fel rhan o’r penwythnos, felly bydd cyfle i ymwelwyr sy’n mwynhau’r dosbarthiadau meistr gofrestru ar gwrs i wella eu sgiliau.”
Yn Hydref 2018, cwblhaodd Sain Ffagan Amgueddfa Werin Cymru y project ailddatblygu mwyaf yn ei hanes. Gwireddwyd hyn diolch i nawdd Cronfa Dreftadaeth y Loteri (HLF), Llywodraeth Cymru a chefnogwyr eraill. Yn 2012 derbyniodd Sain Ffagan y grant mwyaf erioed i’r HLF ei rhoi yng Nghymru er mwyn adrodd hanes bywyd yng Nghymru dros 200,000 o flynyddoedd a mwy.
Cyhoeddwyd yn ddiweddar fod Sain Ffagan ar restr fer gwobr Amgueddfa’r Flwyddyn 2019 y Gronfa Gelf, gaiff ei ystyried yn wobr amgueddfaol fwyaf y byd. Mae’r wobr flynyddol yn dathlu arloesi a llwyddiant rhagorol mewn amgueddfeydd ac orielau ledled y DU.
Mae gan Amgueddfa Cymru saith amgueddfa ar draws Cymru: Amgueddfa Genedlaethol Caerdydd, Sain Ffagan Amgueddfa Werin Cymru, Amgueddfa Lechi Cymru, Amgueddfa Wlân Cymru, Amgueddfa Lleng Rufeinig Cymru, Big Pit Amgueddfa Lofaol Cymru ac Amgueddfa Genedlaethol y Glannau.
Mae mynediad am ddim i’r saith Amgueddfa diolch i gefnogaeth Llywodraeth Cymru.
Codir tâl am rai gweithgareddau, a gall fod cyfyngiadau oed a lle. Rhaid i blant dan 16 fod yng nghwmni oedolyn bob amser wrth gymryd rhan mewn gweithgareddau.
DIWEDD