Datganiadau i'r Wasg

Ers 1982 mae Melin Teifi wedi bod yn gweithredu ar safle’r hen felin Cambrian yn Dre-fach Felindre, Sir Gaerfyrddin, sydd yn gartref i Amgueddfa Wlân Cymru. Sefydlwyd Melin Teifi ym 1982 gan Raymond a Diane Jones ar ôl i Felin Cambrian, lle buont yn gweithio am 18 mlynedd, gau.

Dros y 40 mlynedd ddiwethaf mae’r felin, a’i thîm o grefftwyr profiadol, wedi bod yn rhan annatod o brofiad ymwelwyr ag Amgueddfa Wlân Cymru.

Ychydig iawn o felinau gwlân sydd ar ôl yng Nghymru, ac mae Amgueddfa Cymru yn caffael Melin Teifi yn golygu y bydd y peiriannau yn aros yn eu lle ac yn cael eu gwarchod a’u defnyddio i barhau â thraddodiad gwehyddu gwlân yng Nghymru.

Dywedodd Ann Whittall, Pennaeth Amgueddfa Wlân Cymru:

“Mae Amgueddfa Wlân Cymru wedi gweithio’n agos gyda Raymond a Diane dros y 40 mlynedd ddiwethaf; byddwn yn eu colli’n fawr ar y safle.

 Mae eu hangerdd, eu brwdfrydedd a’u harbenigedd wedi cyfoethogi ein dealltwriaeth a’n gwerthfawrogiad o’r diwydiant gwlân ac wedi cynnig golwg unigryw i’n hymwelwyr ar fywyd mewn melin wlân.

Mae caffael y peiriannau a’r gwyddiau hanesyddol yn sicrhau y bydd Amgueddfa Cymru yn gallu cynnal traddodiad gwehyddu gwlân yng Nghymru i genedlaethau’r dyfodol. Bydd yn galluogi ein crefftwyr i barhau â’u hyfforddiant a datblygu eu sgiliau wrth iddynt gynhyrchu carthenni gwlân o safon.

Hoffai pawb yn Amgueddfa Wlân Cymru ddiolch yn fawr i Raymond a Diane am eu cyfraniad i ddiwydiant gwlân Cymru, a dymuno ymddeoliad hapus iawn iddynt.

Nid diwedd y stori yw hon, ond yn hytrach pennod newydd yn hanes y diwydiant gwlân yng Nghymru.”

Mae Amgueddfa Cymru yn perthyn i bawb ac yma at ddefnydd pawb.

Rydyn ni’n elusen, ac mae ein teulu o saith amgueddfa a chanolfan gasgliadau wedi’u gwasgaru ar draws Cymru. Ein nod yw ysbrydoli pawb trwy stori Cymru – yn ein hamgueddfeydd, yn ein cymunedau ac yn ddigidol.

Mae ein croeso am ddim diolch i nawdd Llywodraeth Cymru, ac mae croeso i bawb o bob cymuned.

Dewch i fod yn rhan o stori Cymru – trwy ymweld â ni, gwirfoddoli, ymuno neu gyfrannu.
www.amgueddfa.cymru

Diwedd