Datganiadau i'r Wasg

Cynhaliodd Big Pit, enillydd Gwobr Gulbenkian am Amgueddfa Orau’r Flwyddyn yn 2005, ei Ddarlith Flynyddol gyntaf yn 2004. Mae’r digwyddiad wedi bod yn boblogaidd dros ben ers y dechrau, ac eleni gwelwyd t? llawn arall.

Eleni, Dr Dulais Rhys oedd yn traddodi’r ddarlith, a’i destun oedd Dr Joseph Parry, y mab i weithiwr haearn o Ferthyr Tudful a ddaeth yn gyfansoddwr toreithiog ac yn un o Gymry enwocaf ei genhedlaeth. Efallai rydyn ni’n ei gofio fwyaf heddiw am ei gân serch Myfanwy. Am y tro cyntaf, cynhaliwyd cyngerdd amser cinio cyn y ddarlith, gyda Band Tref Tredegar, gan ddenu tipyn o ddiddordeb.

Dywedodd Ceidwad a Rheolwr Big Pit, Peter Walker: “Rydyn ni wrth ein bodd bod y Ddarlith Flynyddol wedi bod yn gymaint o lwyddiant eleni. Cafodd y gynulleidfa ddydd Sadwrn ddiwrnod i’r brenin llawn cerddoriaeth, ac rydyn ni’n falch dros ben bod yr achlysur yma’n parhau i fynd o nerth i nerth.

“Mae ychwanegu cyngerdd amser cinio’n enghraifft ymarferol o’r cysylltiadau rhwng diwydiant a cherddoriaeth ar draws maes glo’r de. Rydyn ni’n edrych ymlaen at groesawu rhai o fandiau a chorau meibion mwyaf blaenllaw’r de mewn cyfres o gyngherddau prynhawn Sul dros y gwanwyn.

“Yn ogystal, bydd Dr Dulais Rhys yn ailadrodd y ddarlith ar ein stondin yn yr Eisteddfod Genedlaethol yn Abertawe yn ystod wythnos gyntaf Awst, felly caiff y bobl gollodd allan y tro yma gyfle i’w glywed yn siarad bryd hynny,” ychwanegodd.

Amgueddfa Cymru yw enw newydd Amgueddfeydd ac Orielau Cenedlaethol Cymru, sy'n gyfrifol am weinyddu saith amgueddfa genedlaethol ar hyd a lled Cymru, sef Amgueddfa Genedlaethol Caerdydd; Sain Ffagan: Amgueddfa Werin Cymru; Amgueddfa Lleng Rufeinig Cymru, Caerllion; Big Pit Amgueddfa Lofaol Cymru, Blaenafon; Amgueddfa Wlân Cymru, Dre-fach Felindre; Amgueddfa Lechi Cymru, Llanberis ac Amgueddfa Genedlaethol y Glannau, Abertawe.

Ceir mynediad am ddim i'r holl amgueddfeydd cenedlaethol diolch i gefnogaeth Llywodraeth Cynulliad Cymru.

Nodiadau i Olygyddion

I gael rhagor o wybodaeth am y Ddarlith Flynyddol a’r gweithgareddau cysylltiedig, cysylltwch â: Kathryn Stowers, Swyddog Marchnata a Chysylltiadau Cyhoeddus Big Pit. Ffôn: 01495 790311, 07970 017210
E-bost Kathryn Stowers

•Mae Big Pit ar agor bob dydd rhwng 9.30 am-5 pm. Mae’r teithiau danddaear yn rhedeg yn gyson 10 am-3.30 pm. Rhaid i blant fod dros fetr o daldra i fynd danddaear.