Datganiadau i'r Wasg
Lansio Camau Cymraeg yn Amgueddfa Lechi Cymru
Dyddiad:
2006-06-19Cafodd Camau Cymraeg, pecyn ar gyfer dysgwyr sy'n defnyddio Amgueddfa Lechi Cymru fel adnodd dysgu, ei lansio yn Llanberis yn ddiweddar.
Roedd y digwyddiad yn gyfle i glywed awduron y pecyn, Elwyn Hughes ac Ann Jones o Adran Dysgu Gydol Oes Prifysgol Cymru, Bangor, yn sôn am ei gynnwys, sef cyngor ar gyfer tiwtoriaid a thaflenni gwaith ar gyfer myfyrwyr. Mae'r pecyn wedi'i ysgrifennu er mwyn adlewyrchu strategaethau dysgu ieithoedd cyfredol.
Mae'r pecyn yn dilyn llwyddiant Llwybrau Llafar, pecyn tebyg a ddatblygwyd ar gyfer Sain Ffagan: Amgueddfa Werin Cymru, ddwy flynedd yn ôl. Mae'r ddau becyn yn enghreifftiau o'r gwaith pwysig sy'n cael ei wneud gan Amgueddfa Cymru yn y sector addysg ôl-16. Hefyd yn mynychu'r digwyddiad oedd Alun Pugh, Gweinidog Llywodraeth Cynulliad Cymru dros Ddiwylliant, y Gymraeg a Chwaraeon, Pennaeth Dysgu Amgueddfa Cymru, Ceri Black, Ann Jenkins, Pennaeth Addysg Dwyieithog, Cynulliad Cenedlaethol Cymru a Chyfarwyddwr Gweithdrefnau Amgueddfa Cymru, John Williams-Davies.
Mae Amgueddfa Cymru yn gyfrifol am saith amgueddfa genedlaethol ym mhob cwr o Gymru – Sain Ffagan: Amgueddfa Werin Cymru, Amgueddfa Genedlaethol Caerdydd, Amgueddfa Lleng Rufeinig Cymru, Caerllion, Big Pit: Amgueddfa Lofaol Cymru, Blaenafon, Amgueddfa Wlân Cymru, Dre-fach Felindre, Amgueddfa Lechi Cymru, Llanberis ac Amgueddfa Genedlaethol y Glannau, Abertawe.
Ceir mynediad am ddim i holl safleoedd Amgueddfa Cymru, diolch i gefnogaeth Llywodraeth Cynulliad Cymru.