Datganiadau i'r Wasg

Mae Mr Anderson yn ymuno ag Amgueddfa Cymru ar gyfnod cyffrous i’r sefydliad yn cynnwys datblygiadau i greu Amgueddfa Hanes Genedlaethol yn Sain Ffagan a throi llawr cyntaf Amgueddfa Genedlaethol Caerdydd yn Amgueddfa Gelf Genedlaethol i Gymru, fydd yn cael ei chwblhau yng Ngorffennaf 2011. Mae cynlluniau hefyd i glustnodi llawr gwaelod Amgueddfa Genedlaethol Caerdydd yn Amgueddfa Hanes Natur Cymru.

Wrth gyfarch staff yn Sain Ffagan, cyfeiriodd Mr Anderson – fu gynt yn Gyfarwyddwr Dysgu a Dehongli yn Amgueddfa Victoria ac Albert, Llundain – at rai o’i dasgau allweddol dros y misoedd nesaf:

“Rwy’n falch o gael y cyfle i arwain sefydliad sydd mor uchel ei barch ac sydd ar flaen y gad yn nhermau casglu, ymchwil a rhaglen gyhoeddus, nid yn unig yng Nghymru, ond yn rhyngwladol,” meddai Mr Anderson.

“Mae Sain Ffagan yn ganolfan cenedlaethol poblogaidd ar gyfer diwylliant a hanes Cymru, â staff sy’n teimlo’n gryf dros rannu hyn gydag ymwelwyr.

“Bydd parhau â’r project datblygu yn Sain Ffagan: Amgueddfa Werin Cymru yn cael blaenoriaeth gennyf yn ogystal â chadarnhau lle’r Amgueddfa fel adnodd cyfoes i Gymru. Rôl yr Amgueddfeydd Cenedlaethol yw gwasanaethu pobl Cymru ac mae datblygu partneriaethau diwylliannol yn fodd o gyflawni’r weledigaeth hon yn llwyddiannus. Mae’r ymdriniaeth hon yn bwysicach fyth o ystyried hinsawdd economaidd bresennol y wlad.”

Daw ymweliad David Anderson â Sain Ffagan ychydig cyn un o’i ymrwymiadau cyhoeddus swyddogol cyntaf, lansio dogfen Ysbrydoli Cymru yn Y Senedd, Bae Caerdydd ar ddydd Llun, 18 Hydref 2010.

Mae dysgu yn ganolog i Amgueddfa Cymru ac mae’r papur hwn yn ddathliad o’r gwaith hwn a’n gweledigaeth o fod yn amgueddfa ddysg o safon ryngwladol. Mae’r llyfryn yn dangos bod gennym rôl bwysig yn gwarchod casgliadau’r genedl, ond bod y gwaith o ddehongli a chyfathrebu’r casgliadau i bobl Cymru a’i hymwelwyr yr un mor bwysig.

Dywedodd y Gweinidog Treftadaeth, Alun Ffred Jones:

“Mae Llywodraeth Cynulliad Cymru’n ymrwymedig i wneud ein treftadaeth ddiwylliannol mor hygyrch ag sy’n bosibl. Mae polisi mynediad am ddim i’r saith safle a reolir gan Amgueddfa Cymru yn un o ymrwymiadau Cymru’n Un ac rwy’n falch iawn i weld canlyniadau positif y fenter. Dros y flwyddyn ddiwethaf, ymwelodd dros 1.6 miliwn o bobl â’n saith amgueddfa genedlaethol, cafwyd bron i 1.3 miliwn o ymweliadau i wefan Amgueddfa Cymru ac mae 33,5000 o bobl wedi cymryd rhan mewn gweithgareddau y tu hwnt i’r safleoedd, a drefnwyd gan yr amgueddfeydd.”

Mae Amgueddfa Cymru yn gweinyddu saith amgueddfa genedlaethol ar hyd a lled Cymru: Amgueddfa Genedlaethol Caerdydd; Sain Ffagan: Amgueddfa Werin Cymru; Amgueddfa Lleng Rufeinig Cymru, Caerllion; Big Pit: Amgueddfa Lofaol Cymru, Blaenafon; Amgueddfa Wlân Cymru, Dre-fach Felindre; Amgueddfa Lechi Cymru, Llanberis ac Amgueddfa Genedlaethol y Glannau, Abertawe.

Diolch i gefnogaeth Llywodraeth Cynulliad Cymru mae mynediad am ddim i’r Amgueddfa.

- Diwedd -

Am wybodaeth bellach neu gyfle i gyfweld â David Anderson, cysylltwch â Catrin Mears, Swyddog Cyfathrebu Corfforaethol ar 029 2057 3185 neu drwy e-bostio catrin.mears@amgueddfacymru.ac.uk <mailto:catrin.mears@amgueddfacymru.ac.uk> neu Lleucu Cooke, Swyddog Cyfathrebu, Amgueddfa Cymru ar 029 2057 3175 neu drwy e-bostio lleucu.cooke@amgueddfacymru.ac.uk <mailto:lleucu.cooke@amgueddfacymru.ac.uk>.