Amser Bwyd

Hafan Amser Bwyd

Ffroes

Ffotograff du a gwyn o bedair crempog yn coginio ar radell dros le tân brics hen ffasiwn.

Crasu’r leicecs. Kennixton, Sain Ffagan Amgueddfa Werin Cymru.

Yr oedd cael ffroes i de yn rhan annatod o ddathlu penblwydd pob aelod o’r teulu yn ardal Dowlais ac mewn llawer ardal arall yn ne Cymru.

Y Rysáit

Byddwch angen

  • pwys o flawd plaen
  • owns o ymenyn
  • owns o lard
  • pedwar wy
  • ychydig o laeth
  • (cyrens)

Dull

  1. Gogr yn y blawd i ddysgl. 
  2. Toddi’r ymenyn a’r lard ar soser a’u harllwys i bant yng nghanol y blawd.
  3. Curo’r wyau mewn ychydig o laeth, eu harllwys yn raddol i’r blawd gan gymysgu’r defnyddiau’n drwyadl nes cael cytew o’r un ansawdd â hufen tew.
  4. Ychwanegu ychydig o ddŵr at y cytew cyn gorffen ei guro, i’w wneud yn ysgafn.
  5. Toddi owns o saim ar ffreipan neu blanc, ac arllwys hanner llond cwpan o’r cytew arni.  (Gellir rhoi ychydig o gyrens yn y cytew wrth ei grasu, yn ôl y dewis.) 
  6. Gadael i’r cytew grasu nes gweld tyllau bach yn ymddangos ar yr wyneb cyn troi’r ffroesen wyneb i waered i’w chrasu ar yr ochr arall. 
  7. Yna ei chodi a’i rhoi ar blât mawr, a thaenu ychydig o ymenyn a siwgr arni.
  8. Parhau i grasu gweddill y cytew yn yr un modd, a rhoi’r ffroes yn bentwr, un ar ben y llall, i’w cadw’n gynnes.      

 Ffroes eira

  1. Cymysgu llond cwpan o eira glân i mewn i’r cytew uchod yn lle dŵr.  Yr oedd yr eira yntau’n ei ysgafnhau.

Dowlais, Morgannwg.

Nid yw sylwadau ar gael ar hyn o bryd. Ymddiheuriadau am yr anghyfleustra.