Amser Bwyd

Hafan Amser Bwyd

Burum Cartref

Aberteifi, Ceredigion

Crasu torth mewn cidl

‘Burum total’ neu ‘burum dirwest’ oedd yr enw a roid ar furum cartref yn sir Aberteifi.  Nid oedd y burum hwn mor gryf â’r burum a brynid yn y siopau.  Dyna’r rheswm pam y byddai gwragedd yn gwlychu’r toes fin nos a’i adael i godi mewn lle cynnes tan y bore.

Rhydlewis, Aberteifi.

Byddai llawer o wragedd yn gwneud burum cartref a’i werthu i’r cymdogion am geiniog neu ddwy y peint.  Yr oedd modd prynu burum o’r dafarn hefyd ac yr oedd hwn yn gryfach na’r un a wneid gartref.  Gelwid y naill yn ‘berman dirwest’ neu ‘berman total’ a’r llall yn ‘berman tafarn’ mewn rhai ardaloedd ym Morgannwg, e.e. Pen-prysg, Morgannwg.    

 

Bara

Y Rysáit

Byddwch angen

  • pedair owns o hopys
  • hanner dwsin o datws yn eu crwyn
  • galwyn a hanner o ddŵr
  • llond cwpan te o siwgr
  • llond cwpan te o flawd
  • chwarter peint o hen furum

Dull

  1. Berwi’r hopys a’r tatws mewn galwyn a hanner o ddŵr nes bod y tatws wedi chwalu ynddo. 
  2. Codi’r cymysgedd oddi ar y tân a’i hidlo i badell bridd. 
  3. Gadael i’r trwyth hwn oeri hyd at naws gwaed, cymysgu’r siwgr a’r blawd ag ychydig o’r trwyth a’i roi yn ôl yn y badell ynghyd â’r hen furum.
  4. Gorchuddio’r badell â lliain glân a’i rhoi o’r neilltu mewn lle cynnes am ddau ddiwrnod. 
  5. Yna hidlo’r burum i boteli neu ystenau pridd, eu cau’n dynn â chyrc, a’u cadw mewn lle oer.

Pennant, Trefaldwyn

Nid yw sylwadau ar gael ar hyn o bryd. Ymddiheuriadau am yr anghyfleustra.