Amgueddfa Blog

Hafan y Blog

Oeddech chi’n gwybod ein bod ni, ar gyfartaledd, yn cyhoeddi tua 1000 o negeseuon y mis ar ein rhwydweithiau digidol? Mae pob neges yn rhannu gwybodaeth a rhoi blas o’r hyn sydd gan yr Amgueddfa i’w gynnig, ac mae gennym ni dipyn i’w gynnig.

Yr hyn sydd wrth wraidd yr holl gynnwys sydd yn cael ei rannu ydi gwerthoedd yr Amgueddfa. Fel sefydliad, rydym yn cydnabod ein gwahaniaethau ac yn eu dathlu. Rydym yn awyddus i bob platfform gynnig lle diogel i bobl rannu eu safbwyntiau a barn gyda'i gilydd, i gael sgwrs barchus lle mae pob person yn cael ei drin gyda pharch ac urddas. Ein bwriad ydi creu cynnwys sydd yn rhoi cyfle i chi fedru ymgysylltu hefo ni. Mae mor braf gweld rhyngweithio ar ein platfformau ni ac rydym yn mwynhau ymateb neu fod yn rhan o sgyrsiau difyr ac yn awyddus i barhau gyda hynny.

Yn ddiweddar, fodd bynnag, rydym wedi derbyn ambell i neges sydd yn ysgogi casineb ac wedi dod wyneb yn wyneb a throliaid. Rydym yn cymryd unrhyw neges sydd yn mynd yn groes a’n gwerthoedd o ddifrif. O ganlyniad, rydym wedi bod yn trafod pa ffordd fyddai orau i ymateb, pa gamau i’w cymryd er mwyn tanlinellu ein safbwynt ni at bynciau penodol, a sut i sicrhau bod ein cydweithwyr yn cael eu cefnogi yn ddigonol wrth ymdrin â negeseuon o’r fath.

Y cam cyntaf rydym wedi ei gymryd ydi i ddiweddaru ein polisi rhwydweithiau cymdeithasol. Roeddem yn awyddus i ddiffinio rôl troliaid yn swyddogol ac i danlinellu ein safbwynt ni wrth ymdrin â chasineb a sylwadau negyddol. Ni fyddwn yn goddef, yn esgusodi nac chwaith yn cefnogi gweithredoedd o gasineb, ni fyddwn chwaith yn ymgysylltu gyda throliaid a byddwn yn cymryd camau penodol i rwystro neu ddileu unrhyw berson sydd yn ceisio achosi gofid neu fewnwelediad o gasineb ar unrhyw un o’n cyfrifon ni.

Ychydig o negeseuon yn ysgogi casineb rydym wedi ei dderbyn hyd yn hyn, a bydd ein hymateb yn cael ei ddiffinio yn ôl pob achos. Fodd bynnag, roeddem yn awyddus i gydnabod ein safbwynt ar dderbyn negeseuon o’r fath. Mae modd darllen ein polisi rhwydweithiau cymdeithasol ar y wefan. Yn y cyfamser, cadwch lygad ar ein cyfrifon a mwynhau’r holl gynnwys sydd ganddom ni i’w gynnig.

Gadael sylw