Sadia Pineda Hameed
Canolfan Gelfyddydau Llantarnam Grange a Big Pit Amgueddfa Lofaol Cymru
Llun gan Robin Chaddah-Duke
BYWGRAFFIAD
Artist ac awdur Ffilipina-Bacistanaidd yw Sadia Pineda Hameed. Mae hi'n byw ac yn gweithio yng Nghwm Ebwy ac yn canolbwyntio ar drawma cyfunol a thrawma sy'n pontio cenedlaethau trwy ddefnyddio strategaethau gwrth-drefedigaethol fel breuddwydio, cymundeb delepathig a chyfrinachau. Gan ddefnyddio ffilm, gosodiadau a pherfformiad yn ogystal ag ymchwil i ddulliau cyfalafol a threfedigaethol fel lladd systemau gwybodaeth ac eco-laddiad, mae ei gwaith yn dychmygu sut beth allai dulliau'r dyfodol mewn perthynas â gwrthsefyll, gwerth a chyfathrebu fod yn seiliedig ar y strategaethau hyn. Mae ei gwaith yn cynnwys creu mythau a melodrama fel dulliau chwareus, gan drochi gwylwyr mewn disgwrs dryslyd lle mae archifau personol a phrofiadau cyfunol yn cydblethu, gan ein hannog i adlewyrchu ar lefel ddyfnach am ein hanesion a hunaniaethau a rennir.
DISGRIFIAD
Gan weithio gyda Llantarnam Grange a Big Pit Amgueddfa Lofaol Cymru, mae Sadia Pineda Hameed wedi datblygu corff newydd o waith sy'n edrych ar sut mae mudiadau radical y gorffennol yn bodoli mewn undod â mudiadau rhyngwladol heddiw. Trwy ystyried y casgliad, sgyrsiau a chymuned yr amgueddfa trwy lens gwrth-drefedigaethol, gwrth-gyfalafol ac ecolegol, mae Sadia yn creu cysylltiadau rhwng hanes mwyngloddio a streicio Cymru â mudiadau llafur ar draws y byd heddiw.
DYFYNIAD
"Mae'r project yn edrych ar strategaethau gwrthsafiad streiciau mwyngloddwyr Cymru - oedd yn brwydro dros hawliau gweithwyr, ac i warchod tir, diwylliant a chymuned - a sut y daeth y rhain yn symbolau o gefnogaeth ryngwladol i streicwyr heddiw."
CYFRYNGAU CYMDEITHASOL / GWEFAN
Instagram:https://www.instagram.com/sadiaph/
Gwefan:https://sadiaph.com/
SIGNALAU
Roedd Signalau i’w gweld yn Amgueddfa Lofaol Big Pit o 31 Mai – 31 Awst 2025. Roedd y prosiect yn archwilio sut mae mudiadau radical y gorffennol yn bodoli mewn solidariaeth rhyngwladol gyda mudiadau heddiw. Gan weithio gyda Llantarnam Grange, a trwy edrych ar gasgliadau, sgyrsiau a chymuned Big Pit drwy lens wrth-drefedigaethol, gwrthgyfalafol ac ecolegol, mae Sadia Pineda Hameed wedi gwneud cysylltiadau rhwng hanes glofaol Cymru a’i streiciau, a mudiadau llafur mwyngloddio ledled y byd heddiw.
Galwadau Hirbell, 2025 - Cerflun piwtar a gosodwaith
Cyfres o gerfluniau ffôn llinyn ar ffurf llestri arian coffaol yw Galwadau Hirbell, gyda phob pâr yn cysylltu rhwng cydsafiad streiciau’r glowyr yng Nghymru a mwynwyr gwledydd De’r byd. Wedi’i ysbrydoli gan system glychau Big Pit – a ddefnyddid gan lowyr i gyfathrebu dan y ddaear mewn cod trwy gyffwrdd dwy wifren fetel â’i gilydd.
Sain yn Symud, 2025 - Ffilm 16mm ac archifol 8mm (8 mun) a gosodwaith a ddagoswyd yn ddyddiol o 3-4pm
Gwaith dyfaliadol yw Sain yn Symud sy’n pontio’r 1980au a Chymru’r dyfodol agos, wedi’i saethu ar Super 16mm. Yn y ffilm, clywir synau ymgyrchoedd a strategaethau gwrth-drefedigaethol a gwrthgyfalafol a streiciau mwynwyr ein hoes ni yn cael eu darlledu’n danddaearol i’r gorffennol drwy flychau ffrydio Soundcamp.
