Creuwch eich rhan yn Arddangosfa Gobaith yr Amgueddfa Wlân Cymru

Gallwch gymryd rhan drwy gyfrannu at flanced enfys enfawr fydd yn cael ei gwnïo at ei gilydd gan wirfoddolwyr a’i harddangos yn Amgueddfa Wlân Cymru pan fyddwn yn ailagor. Gofynnwn i bob cyfrannwr creu sgwâr bychan o unrhyw liw, boed hynny er enghraifft trwy wau (unrhyw bwyth), wehyddu neu crosio, ond o faint cwmws 8” neu 20cm sgwâr. Lawrlwytho’r batrwm i gael yr union faint, nifer o bwythau ayyb. Ar ôl i’r arddangosfa ddod i ben, byddwn yn creu blancedi llai o’r flanced fawr ac yn eu rhoi i wahanol elusennau.

Caiff enfys ei defnyddio’n aml fel symbol o obaith a heddwch, ac fel y gwyddom, mae fel arfer yn ymddangos ar ôl glaw trwm. Mae’r enfys yn ein hatgoffa y daw eto haul ar fryn.

Yr Enfys

gan Eifion Wyn

Mae'n awyr las ers meitin,
A dacw Bont y Glaw;
Wel, brysiwn dros y caeau,
A thani law yn llaw.

Cawn eistedd yn ei chysgod,
A holi pwy a'i gwnaeth,
Un pen ar grib y mynydd,
A'r llall ar fin y traeth.

Mae saith o liwiau arni,
A'r rheini'n dlws i gyd;
A gwnaed ei bwa meddir,
O flodau gwyw y byd.

Ond dacw'r Bont yn symud, -
Pwy ŵyr i ble yr aeth?
Nid yw ar grib y mynydd,
Na chwaith ar fin y traeth.

Sut alla i gymryd rhan?

Gallwch creu eich sgwâr mewn unrhyw ffordd, e.e. trwy wau (unrhyw bwyth) wehyddu neu crosio. Rydym am i’r flanced fawr fod mor lliwgar â phosibl, felly gall eich sgwâr fod yn unrhyw liw! Ond mae angen i’r sgwâr fod o faint cwmws 8” neu 20cm sgwâr. Edrychwch ar ein patrwm ac ewch ati i grefftio!

Diweddariad:

Diolch i bawb sydd wedi bod yn cymryd rhan yn Arddangosfa Gobaith. Rydyn ni wedi cael llawer o ddiddordeb! Sylwch, fodd bynnag, oherwydd newid mewn amgylchiadau, ni fyddwn yn creu darn o waith celf o ffotograffau enfys mwyach. Ar hyn o bryd mae Amgueddfa Cymru yng nghanol project Casglu Covid: Cymru 2020 felly os hoffech roi eich ffotograffau enfys i’r project yma.

Rydyn ni’n edrych ymlaen at dderbyn eich sgwariau yn y post. Anfonwch nhw at
Arddangosfa Gobaith
Amgueddfa Wlân Cymru
Dre-fach Felindre ger Castell Newydd Emlyn
Llandysul
Sir Gaerfyrddin
SA44 5UP

Dyddiad cau cyfraniadau yw 31/12/2020

Defnyddir y sgwariau i greu blanced enfys enfawr ac yn dilyn yr arddangosfa bydd blancedi llai yn cael eu creu o’r flanced enfawr a’u rhoi i elusennau, ni fydd eich sgwariau yn dod yn rhan o’r Casgliad.

Cymerwch ofal, a diolch am gymryd rhan.