Datganiadau i'r Wasg

Caiff y Gronfa Her ei dyrannu i gefnogi gwaith ymchwil a datblygu i ffyrdd arloesol o brofi a rhyngweithio â chasgliadau Amgueddfa Cymru, yn lleol ac yn fyd-eang.

Dyma gyfle i weithio gydag Amgueddfa Cymru i alluogi defnyddwyr ac ymwelwyr i ddarganfod a dehongli straeon Cymru - yn ddigidol ac yn gorfforol - ble bynnag y byddwch chi yn y byd.

Nod Amgueddfa Cymru yw ysbrydoli pobl a newid bywydau, gan sicrhau fod diwylliant yn hygyrch i bawb. Rydym yn gwahodd pawb i chwarae rhan weithredol wrth greu hanes Cymru. Mae hyn yn golygu y caiff unrhyw un gael blas ar Amgueddfa Cymru yn eu dewis ddull - wyneb yn wyneb neu'n ddigidol, ac yn ein hamgueddfeydd neu yn eu cymunedau.

Meddai Nia Williams, Cyfarwyddwr Addysg a Rhaglenni Cyhoeddus Amgueddfa Cymru:

“Rydyn ni wrth ein bodd o gael gweithio gyda Clwstwr. Bydd y Gronfa Her yn dod ag Amgueddfa Cymru a'r diwydiannau creadigol yng Nghymru ynghyd gan roi cyfle i ni weithio gyda thechnoleg ac arloesedd sydd ar flaen y gad.

Mae Clwstwr yn annog pobl greadigol i adael i'w syniadau ffynnu trwy wneud gwaith ymchwil a datblygu ar gyfer cynhyrchion, syniadau a phrofiadau newydd yn y sector sgrin.

Meddai Adam Partridge, Cynhyrchydd ac arweinydd partneriaethau Clwstwr:

"Rydyn ni'n croesawu'r bartneriaeth newydd hon ag Amgueddfa Cymru a'r cyfle i gysylltu hyd yn oed mwy o bobl greadigol yn y sector treftadaeth. Trwy'r Gronfa Her a chefnogaeth gofleidiol Clwstwr ar gyfer ymchwil a datblygu, rydyn ni'n rhagweld y daw llawer o syniadau gwych i'r fei fydd yn gwthio ffiniau ein profiad o amgueddfeydd, nawr ac yn y dyfodol.

Gwahoddir datganiadau o ddiddordeb ar gyfer y Gronfa Her o 20 Medi 2021 ymlaen. Yna caiff ymgeiswyr eu gwahodd i ddatblygu eu syniadau mewn Gweithdy Her ymarferol cyn cwblhau cais ffurfiol.

Erbyn mis Tachwedd 2021, bydd dau dîm llwyddiannus yn cael hyd at £25,000 yr un i ymchwilio, datblygu a gweithredu eu projectau arloesol erbyn mis Mawrth 2022. Dylai syniadau fod yn fodiwlaidd, gyda modd eu tyfu yn unol ag anghenion ac yn cynnwys elfen gref o gydguradu. Bydd y timau llwyddiannus yn cael mynediad at adnoddau diwylliannol dihafal Amgueddfa Cymru i'w helpu ar hyd y broses.

Diwedd

NODIADAU I’R GOLYGYDD

• Mae Amgueddfa Cymru yn deulu o saith amgueddfa a chanolfan gasgliadau, sydd am ddim i'r cyhoedd diolch i gefnogaeth Llywodraeth Cymru. Gyda'n gilydd, rydyn ni'n gartref i gasgliadau celf, hanes, treftadaeth a gwyddoniaeth y genedl, fydd yn parhau i dyfu er mwyn i genedlaethau heddiw ac yfory eu mwynhau.

Enillodd un o amgueddfeydd ein teulu, Sain Ffagan Amgueddfa Werin Cymru, sy'n gartref i hanes a diwylliant Cymru wobr Amgueddfa'r Flwyddyn y Gronfa Gelf yn 2019.

Fel elusen gofrestredig, mae Amgueddfa Cymru'n gwerthfawrogi pob cefnogaeth. Cefnogir y rhaglen ddigwyddiadau ac arddangosfeydd gan chwaraewyr y People's Postcode Lottery. 

• Rhaglen bum mlynedd yw Clwstwr i greu cynhyrchion, gwasanaethau a phrofiadau newydd i'r sgrin. Mae'n adeiladu ar lwyddiant de Cymru o greu cynnwys creadigol trwy roi ymchwil a datblygiad wrth galon cynhyrchu, gan greu diwylliant o arloesi yn y clwstwr sy'n symud y sector sgrin o gryfder i arweinyddiaeth ryngwladol.   Prifysgol Caerdydd sy'n arwain y rhaglen mewn partneriaeth â Phrifysgol De Cymru a Phrifysgol Metropolitan Caerdydd. Noddir Clwstwr gan Raglen Glystyrau'r Diwydiannau Creadigol, rhan o Gronfa Her Strategaeth Ddiwydiannol Llywodraeth y DU a Chymru Greadigol.