Datganiadau i'r Wasg

Ar ddydd Sul 2 Chwefror, bu’n rhaid i Amgueddfa Cymru gau Amgueddfa Genedlaethol Caerdydd i’r cyhoedd dros dro oherwydd problem fecanyddol gafodd ei hachosi gan fethiant cydran, a hynny mewn ardal benodol o fewn yr adeilad.

Ers hynny, mae ein timoedd wedi bod yn gweithio'n ddyfal i wneud y gwaith atgyweirio hanfodol yn y ffordd gyflymaf a mwyaf effeithiol posibl er mwyn sicrhau bod yr adeilad yn diwallu’r holl safonau diogelwch gofynnol.

Rydyn ni’n cydnabod yr effaith a gafwyd ar ein hymwelwyr, ond diogelwch a lles ein hymwelwyr, gwirfoddolwyr a staff, ynghyd â diogelu ein casgliadau, yw ein prif flaenoriaeth.

Meddai’r Prif Weithredwr, Jane Richardson:

“Fel cynifer o sefydliadau eraill ar draws Cymru a gweddill Prydain, mae rheoli a chynnal adeiladau sy’n heneiddio yn her barhaus. Hoffwn i ddiolch i’n staff a’n cyflenwyr sydd wedi gweithio ddydd a nos er mwyn datrys y broblem a helpu i leihau’r effaith ar ein hymwelwyr.

“Rydyn ni hefyd yn hynod ddiolchgar am yr holl gefnogaeth ddiffuant, amynedd a dealltwriaeth gan y cyhoedd yn ystod y cyfnod yma – rydyn ni’n edrych ymlaen at eich croesawu chi’n ôl.”

O ddydd Gwener, bydd Amgueddfa Genedlaethol Caerdydd ar agor 6 diwrnod yr wythnos (dydd Mawrth – dydd Sul) rhwng 10am a 4pm. Mae ar gau ar ddyddiau llun heblaw am Wyliau Banc.

Mae tocynnau ar werth ar gyfer arddangosfa Amgueddfa Cymru, Streic ’84-85. Ewch i https://amgueddfa.cymru/caerdydd am ragor o wybodaeth.

Diwedd y datganiad