Datganiadau i'r Wasg

Cynhyrchwyd yr arddangosfa gan brosiect ‘CROESO’ y Comisiwn Cydraddoldeb Hiliol. Mewn ffordd wefreiddiol llawn ysbrydoliaeth, mae’n adrodd hanes Robeson wrth iddo ddod wyneb yn wyneb â rhagfarn ac anoddefgarwch.

Dywedodd Sharon Ford, Swyddog Addysg Big Pit: “Dyma arddangosfa sy’n ysbrydoli, ac sy’n archwilio bywyd dyn hynod, ei gysylltiadau â’r Cymry a’i bwysigrwydd wrth drafod amrywiaeth a chydraddoldeb hiliol. Ochr yn ochr â’r arddangosfa, bydd Croeso hefyd yn cynnal cyfres o weithdai mewn ysgolion, lle gall pobl ifanc o gymunedau yn ne Cymru ddysgu mwy am Paul Robeson.

“Mae’r disgyblion sy’n cymryd rhan yn y gweithdai’n dod o ardal eang – o Ferthyr Tudful i Gasnewydd, ac o Flaenau Gwent i Gas-Gwent. Bydd gan bob un ohonynt gyfle i ymateb i’r arddangosfa ac i archwilio eu canfyddiad eu hunain o gydraddoldeb hiliol.

“Mae’r arddangosfa’n haeddu ei lle, gan fod Paul Robeson wedi uniaethu cymaint â mwynwyr de Cymru, ac fe gafodd ei fabwysiadu gan filoedd o weithwyr y pyllau yn ne Cymru fel icon o’u hymdrech rhag gorthrwm y cyfnod.”

Bydd arddangosfa Gadewch i Paul Robeson Ganu yn cael ei chynnal yn Big Pit o ddydd Sadwrn 30 Medi tan ddydd Iau 12 Hydref.

Mae Amgueddfa Cymru yn gweinyddu saith amgueddfa genedlaethol ar hyd a lled Cymru: Amgueddfa Genedlaethol Caerdydd; Sain Ffagan: Amgueddfa Werin Cymru; Amgueddfa Lleng Rufeinig Cymru, Caerllion; Big Pit: Amgueddfa Lofaol Cymru, Blaenafon; Amgueddfa Wlân Cymru, Dre-fach Felindre; Amgueddfa Lechi Cymru, Llanberis ac Amgueddfa Genedlaethol y Glannau, Abertawe. Mae Amgueddfa Cymru yn dathlu ei chanmlwyddiant yn 2007. Am ragor o wybodaeth ewch i www.amgueddfacymru.ac.uk.

Ceir mynediad am ddim i holl safleoedd Amgueddfa Cymru, diolch i gefnogaeth Llywodraeth Cynulliad Cymru.