Y Pwyllgor Archwilio, Risg a Sicrwydd

Cylch Gorchwyl Penodol

Diben

Pwyllgor sefydlog sy’n un o ofynion Dogfen Fframwaith Llywodraeth Cymru gydag Amgueddfa Cymru yw’r Pwyllgor Archwilio, Risg a Sicrwydd. Ei brif rôl yw cynghori’r Bwrdd a chefnogi’r Cyfarwyddwr Cyffredinol / Swyddog Cyfrifyddu ar faterion risg, stiwardiaeth ac atebolrwydd ariannol, rheolaeth a llywodraethu mewnol.

Hywel John yw Cadeirydd y Pwyllgor Archwilio, Risg a Sicrwydd.

Cwmpas

Bydd y Pwyllgor yn rhoi sicrwydd ynghylch sefydlu a chynnal amgylchedd rheoli effeithiol er mwyn sicrhau uniondeb, cynaliadwyedd a pharhad o ran cyllid a’r busnes ehangach. Bydd yn monitro prosesau rheoli risg Bwrdd Amgueddfa Cymru i sicrhau eu bod yn effeithiol wrth ddarogan risgiau’r dyfodol yn ogystal â mynd i’r afael â’r rhai presennol, a bod y mesurau lliniaru risg yn gyson â pharodrwydd Bwrdd Amgueddfa Cymru i dderbyn risg.

Bydd y Pwyllgor yn darparu Adroddiad Blynyddol i’r Bwrdd a’r Cyfarwyddwr Cyffredinol/Swyddog Cyfrifyddu yn crynhoi’r busnes y mae wedi’i gyflawni yn ystod y flwyddyn a’r casgliadau y mae wedi’u tynnu. Bydd hyn hefyd yn llywio’r gwaith o lunio Datganiad Llywodraethu’r Prif Weithredwr/Swyddog Cyfrifyddu.

Cyfrifoldebau

Bydd y Pwyllgor Archwilio, Risg a Sicrwydd yn cynghori’r Cyfarwyddwr Cyffredinol yn rhinwedd ei swydd fel Swyddog Cyfrifyddu a’r Bwrdd ynglŷn â’r canlynol:

• effeithiolrwydd, digonolrwydd a phriodoldeb trefniadau’r Amgueddfa ar gyfer archwilio mewnol ac allanol
• digonolrwydd a phriodoldeb y prosesau strategol ar gyfer risg, rheoli a llywodraethu
• gweithgareddau arfaethedig a chanlyniadau archwiliadau mewnol ac allanol
• digonolrwydd ymateb y rheolwyr i faterion a nodwyd drwy weithgareddau archwilio
• gweithredu cod ymddygiad yr Amgueddfa i aelodau’r Bwrdd, y Gofrestr Buddiannau a’r cod ymddygiad i’r staff, gan gynnwys y gwasanaeth chwythu’r chwiban
• digonolrwydd polisïau yn erbyn twyll, llygredd a chwythu’r chwiban
• sicrwydd ynglŷn â gofynion llywodraethu corfforaethol y sefydliad gan gynnwys y Datganiad Llywodraethu

Cyfarfodydd

Fel arfer bydd y Pwyllgor yn cyfarfod bob chwarter ac yn trefnu’r cyfarfodydd drwy’r Rheolwr Llywodraethu Corfforaethol ar ddyddiadau sy’n briodol ar gyfer cynnal yr adolygiad o’r rhaglenni gwaith archwilio mewnol ac allanol. Gelwir rhagor o gyfarfodydd os bydd eu hangen.

Aelodaeth

Bydd y Llywydd, yr Is-lywydd a’r Trysorydd, a hyd at bedwar aelod arall o blith yr Ymddiriedolwyr yn aelodau o’r Pwyllgor Archwilio, Risg a Sicrwydd.

Y rhai eraill a fydd yn bresennol yw’r Cyfarwyddwr Cyffredinol, y Prif Swyddog Gweithredu, y Cyfarwyddwr Adnoddau Corfforaethol, y Cyfarwyddwr Profiad Ymwelwyr, y Cyfarwyddwr Datblygu Busnes, y Cyfarwyddwr Addysg a Rhaglenni Cyhoeddus a’r Rheolwr Llywodraethu Corfforaethol.