Casgliadau Arlein

Mae’r ddesg hon yn un o nifer o weithiau a ddyluniwyd gan Seddon i’w harddangos yn yr Arddangosfa Ryngwladol yn Llundain ym 1862 ac roedd yn un o’r prif weithiau yn y Llys Canoloesol, a drefnwyd gan gyfaill Seddon, y pensaer William Burges. Ni fu Burges yn hael ei ganmoliaeth wrth gymharu’r ddesg â’r celfi lliwgar eraill yn y Llys Canoloesol. Dywed fod Seddon yn argaenu lliw, a bod y celfi, o ganlyniad i’r dewis o ddeunydd, yn llai tebygol o gael eu niweidio nag eraill. Fodd bynnag, tra bod gweithiau Seddon a Pritchard (ei bartner busnes) oedd â phaneli ffigwr wedi’u paentio yn edrych yn dda, doedd y bwrdd ysgrifennu bach, lle defnyddir argaenu yn unig, ddim yn cyrraedd yr uchelfannau hynny.