Gweithdy Amgueddfa

Glo Mân: Glowyr a Pherchnogion y Pyllau Glo mewn 30 munud

🔍 Darganfod ac Archwilio

Sut oedd bywyd yn wahanol i lowyr a pherchnogion y pyllau glo yng Nghymru? 

Camwch yn ôl mewn amser a dysgu am fywydau pedwar dyn a menyw o orffennol diwydiannol Cymru. Fe gewch archwilio themâu mudo, rôl glo stêm Cymru, peryglon y diwydiant glo a datblygiad diwydiannol Cymru.

✏️ Cymryd Rhan

⁠Yn y sesiwn hon, byddwch chi'n ymgolli ym mywydau’r bobl oedd yn rhan o ddiwydiant glo Cymru drwy wisgoedd pwrpasol yn seiliedig ar gofnodion hanesyddol o Gymru.

Bydd disgyblion yn dysgu drwy wisgo i fyny a bod yn lowyr a pherchnogion.

ℹ️ Ynglŷn â'r sesiwn hon

Mae Glowyr a Pherchnogion Glo yn trafod themâu iechyd ac anafiadau ac mae'n cyfeirio rhywfaint at farwolaeth. 

Sesiwn ryngweithiol yw hon sydd ag elfennau corfforol. Rhowch wybod i ni wrth archebu os oes gennych chi ddisgyblion a allai fod yn sensitif i’r profiadau hyn, ac fe wnawn ein gorau i wneud i bawb deimlo’n gyfforddus.

Hyd: 30 munud
Tâl: Dan arweiniad staff yr Amgueddfa – £40 am hyd at 15 disgybl, £60 am hyd at 35 disgybl. Am ddim i rai ysgolion (gwelwch sut i archebu).

Cwricwlwm

Dyniaethau: Mae byd natur yn amrywiol a dynamig, a dan ddylanwad prosesau a gweithgarwch dyn.  Mae cymdeithasau dynol yn gymhleth ac yn amrywiol, ac maen nhw’n cael eu llywio gan weithredoedd a chredoau pobl.

Iechyd a lles: Mae sut fyddwn ni'n ymwneud â dylanwadau cymdeithasol yn siapio ein personoliaeth ac yn effeithio ar ein hiechyd a'n lles. 

Amcanion Dysgu 

  • Adeiladu cnewyllyn gwybodaeth a meithrin y sgiliau i gysylltu a chymhwyso'r wybodaeth honno mewn gwahanol gyd-destunau drwy ddysgu am rôl y bobl oedd yn rhan o ddiwydiant glo Cymru.

     
  • Arwain a chwarae gwahanol rolau a deall rolau pobl yn y gorffennol. 
  • Datblygu dealltwriaeth o'u diwylliant, eu cymuned, eu cymdeithas a'u byd, ddoe a heddiw, drwy ddarganfod mwy am fywydau a rolau perchnogion a gweithwyr glo yng Nghymru yn y bedwaredd ganrif ar bymtheg.
  • Meithrin lles meddyliol ac emosiynol drwy ddatblygu hyder, gwydnwch ac empathi drwy ddysgu am iechyd a lles cymunedau glofaol yng Nghymru. ⁠ 
Plant yn chwarae mewn gwisg Fictoraidd uwchben Pwll Mawr.
Big Pit Amgueddfa Lofaol Cymru

Sut i archebu

I archebu neu i drafod y sesiwn ffoniwch (029) 2057 3650