Hyfforddiant doethurol yn
Amgueddfa Cymru

Consortiwm CDP4 Diwylliant a Threftadaeth Cymru

Yn haf 2023 lawnsiwyd ail rownd Consortiwm CDP4 Diwylliant a Threftadaeth Cymru newydd gyda Gardd Fotaneg Genedlaethol Cymru a Llyfrgell Genedlaethol Cymru.

Mae 10 safle’r bartneriaeth hon yn gartref i gasgliad amrywiol o lyfrau, llawysgrifau, recordiadau sain, ffilmiau, gweithiau celf, sbesimenau hanes natur ac arteffactau archaeolegol sy’n dyddio’n ôl dros 2,500 o flynyddoedd. Mae’r rhain yn cynnwys tirwedd dreftadaeth 400 acer, gofodau ac orielau amgueddfa, amgueddfeydd diwydiannol gweithiol, crefftwaith traddodiadol, adeiladau hanesyddol sy'n dyddio'n ôl mor bell ag Oes yr Haearn, llyfrgell adnau cyfreithiol, dros 2,000 o fetrau ciwbig o archifau, a chanolfan gasgliadau genedlaethol.

Mae gan y consortiwm bedwar prif faes ymchwil:

1. Cynrychioli pawb: Sut allwn ni adrodd straeon newydd, ail-ddehongli casgliadau i adrodd hanesion cyfarwydd drwy leisiau newydd, ac ymgysylltu â chynulleidfaoedd newydd?

2. Diogelu bioamrywiaeth: Sut allwn ni gefnogi ymatebion i’r argyfwng hinsawdd a’r argyfwng bioamrywiaeth sy’n seiliedig ar dystiolaeth, a diogelu ein hecosystemau?

3. Mynediad digidol at gasgliadau: Sut all technoleg ddigidol effeithio ar hygyrchedd, dehongliad casgliadau a’r mathau o straeon rydyn ni’n eu hadrodd?

4. Cadwraeth: Sut all y sector treftadaeth reoli dewisiadau a blaenoriaethau cadwraeth mewn cyd-destun newydd o ddefnyddio casgliadau, ehangu cyfranogiad a thirweddau newidiol?

Rydyn ni'n chwilio am brojectau ymchwil sy'n mynd i'r afael â'r themâu hyn, ac yn cyd-fynd yn agos â'n meysydd gwaith a'n gwerthoedd sefydliadol. Fel arfer, disgwylir i dîm goruchwylio pob project gynnwys 4 goruchwylydd: 2 o’r sefydliad partner, a 2 o’r brifysgol.

Drwy ein partneriaeth, pynciau ymchwil, cynllun gweithredu Cydraddoldeb, Amrywiaeth a Chynhwysiant, a rhaglen o ddigwyddiadau i fyfyrwyr, rydym am gefnogi diwylliant hyfforddiant ymchwil doethuriaeth bywiog, amrywiol a chysylltiedig yng Nghymru.

Byddwn yn dyfarnu 14 ysgoloriaeth PhD dros dair galwad am nawdd ym mis Medi 2023, 2024 a 2025 ar gyfer projectau sy'n dechrau yn ystod yr hydref yn 2024, 2025 a 2026.

Trydedd rownd

Os ydych chi'n academydd sydd wedi'i leoli mewn Sefydliad Addysg Uwch, mae mynegiadau o ddiddordeb bellach ar agor ar gyfer ein trydedd rownd. Byddwn yn dyfarnu 5 ysgoloriaeth, gan ddechrau ym mis Hydref 2026, yn y rownd derfynol hon.

Cyflwynwch eich mynegiant o ddiddordeb trwy ein ffurflen ar-lein erbyn dydd Gwener 12 Medi 2025.

Hyfforddiant Doethuriaeth Cydweithredol – Ffurflen Datganiad o Ddiddordeb

Digwyddiadau briffio

Byddwn yn cynnal dau ddigwyddiad briffio ym mis Gorffennaf 2025 ar gyfer ein trydedd rownd:

Mae'r digwyddiadau briffio yn gyfle i staff ym mhob un o'n sefydliadau, ac ymchwilwyr prifysgol sydd â diddordeb mewn datblygu prosiectau PhD gyda ni, ddysgu mwy am ein consortiwm a'i amcanion yn ogystal â dechrau datblygu partneriaethau posibl.

I gofrestru ar gyfer y digwyddiad briffio, defnyddiwch y dolenni uchod.

Amserlen ar gyfer y drydedd rownd ariannu

  • ⁠Gorffennaf 2025: Digwyddiad briffio
  • 12 Medi 2025: Dyddiad cau ar gyfer cyflwyno datganiad o ddiddordeb
  • 21 Tachwedd 2025: Dyddiad cau ar gyfer cyflwyno cynnig llawn
  • Ionawr 2026: Adolygiad panel
  • Chwefror – Mai 2026: Hysbysebu
  • Mehefin 2026: Cyfweliadau
  • Medi 2026: Ysgoloriaethau'n dechrau