Ffrynt Cartref: Cymru yn yr Ail Ryfel Byd
Dysgwch am Ffrynt Cartref yr Ail Ryfel Byd yng Nghymru drwy archwilio ffotograffau, gwrthrychau, paentiadau a recordiadau sain go iawn yng nghasgliad Amgueddfa Cymru.
Byddwch chi’n gweld sut effeithiodd y rhyfel ar bob rhan o fywyd pobl Cymru – o ddogni bwyd a dillad, i wneud bomiau mewn ffatrïoedd! Dysgwch pa mor bwysig oedd menywod i'r Ffrynt Cartref a sut y newidiodd bywyd bob dydd i blant.
Gall yr adnodd rhyngweithiol gael ei ddefnyddio gan unigolyn neu yn y dosbarth. Rydyn ni’n argymell dychwelyd at yr adnodd, a chanolbwyntio ar bob adran yn ei thro.
Dyluniwyd yr adnodd ar gyfer Cam Cynnydd 2, ond gall gael ei addasu ar gyfer unrhyw ddisgybl.
Agorwch y llyfr rhyngweithiol uchod neu cliciwch y bodlun isod i lawrlwytho PDF gyda nodwedd ‘Read Aloud’ y gallwch chi wrando arno.
Eich Ffrynt Cartref | Sut i ymchwilio i'ch cymuned leol yn ystod yr Ail Ryfel Byd
Mae’r adnodd hwn yn canolbwyntio ar Ffrynt Cartref yr Ail Ryfel Byd er mwyn dangos ffyrdd syml o ymchwilio i hanes ar-lein.
Cwricwlwm
Y DYNIAETHAU | Mae ymholi, archwilio ac ymchwilio yn ysbrydoli chwilfrydedd am y byd, ei orffennol, ei bresennol a’i ddyfodol.
Bydd taith y dysgwyr trwy’r Maes hwn yn ysgogi ymholi a darganfod, wrth iddyn nhw gael eu herio i fod yn chwilfrydig ac i gwestiynu, i feddwl yn feirniadol a myfyrio ar dystiolaeth. Mae meddwl ymholgar yn ysgogi ffordd greadigol a newydd o feddwl, a thrwy hyn gall dysgwyr feithrin dealltwriaeth ddyfnach o’r cysyniadau sy’n sail i’r dyniaethau, a sut i’w cymhwyso mewn cyd-destunau lleol, cenedlaethol a byd eang. Gall meddylfryd o’r fath fod o gymorth i ddysgwyr ddeall profiadau pobl a’r byd naturiol yn well.
Mae ymholi yn fwy nag ymarferiad academaidd; mae’n galluogi myfyrio sydd o gymorth i ddysgwyr ddeall y cyflwr dynol. Yn ei dro, gall hyn ychwanegu ystyr at fywydau’r dysgwyr, a chyfrannu at eu hymdeimlad o le a bydolwg.
