Amdanom ni

Polisi Ffotograffiaeth a Ffilmio

1. Cyflwyniad

Mae'r Polisi Ffotograffiaeth a Ffilmio hwn yn berthnasol i ymwelwyr, gwirfoddolwyr, ymchwilwyr, myfyrwyr a chontractwyr. Mae'n berthnasol i bob safle ac ardal; yr orielau, ar yr ystad a thu ôl i'r llenni yn Amgueddfa Cymru.

Nid yw'r polisi hwn yn berthnasol i ffotograffwyr proffesiynol sydd wedi'u comisiynu gan Amgueddfa Cymru. Rhaid i ffotograffwyr a gomisiynir gydymffurfio â thelerau'r Cytundeb Gwasanaeth Proffesiynol y mae'n rhaid ei gwblhau, ei lofnodi a'i ddychwelyd cyn i unrhyw waith ffotograffiaeth ddechrau.

2. Telerau cyffredinol

Rydyn ni am i'n gofodau ysbrydoli a chreu atgofion newydd, ac rydyn ni’n eich croesawu i dynnu lluniau. Fodd bynnag, rhaid i’r ffotograffiaeth fod at ddefnydd personol ac yn anfasnachol oni bai bod caniatâd ysgrifenedig wedi'i roi. Mae hyn yn berthnasol yn achos ffilmio hefyd.

  • Ni chaniateir defnyddio fflach, cynhlawyr camera a ffyn hunlun. Oni chytunir ar ganiatâd ymlaen llaw, ni chaniateir defnyddio dyfeisiau o'r fath.
  • Mae rhai eitemau sy'n cael eu harddangos yn dal i fod dan amodau hawlfraint. Eich cyfrifoldeb chi yw sicrhau nad yw hawlfraint a chyfreithiau eraill yn cael eu torri.
  • Gwaherddir tynnu lluniau a ffilmio plant a phobl ifanc, yn enwedig grwpiau ysgol a'r rhai sy'n mynychu digwyddiadau teuluol, heb gydsyniad yr oedolyn sy’n eu hebrwng.
  • Gwaherddir tynnu lluniau a ffilmio oedolion hefyd heb eu cydsyniad.
  • Rhaid i ymwelwyr beidio â chyffwrdd na dod i gysylltiad â gwrthrychau, plinthiau neu gasys wrth dynnu lluniau neu ffilmio unrhyw un o'r eitemau sy'n cael eu harddangos.

Gall rhai eitemau sy'n cael eu harddangos yn yr orielau, ar yr ystad neu y tu ôl i'r llenni yn Amgueddfa Cymru fod yn ddarostyngedig i gyfreithiau hawlfraint neu gallant fod yn eitemau ar fenthyg i Amgueddfa Cymru. Mewn achosion o'r fath, gwaherddir tynnu lluniau a ffilmio. Felly, ni chaniateir i wirfoddolwyr, ymchwilwyr, myfyrwyr a chontractwyr dynnu lluniau neu ffilmio mewn mannau lle mae yna arwydd 'dim ffotograffiaeth na ffilmio'.

Pan fyddwch chi mewn ardaloedd nad ydyn nhw’n agored i’r cyhoedd, rhaid i ymwelwyr, gwirfoddolwyr, ymchwilwyr, myfyrwyr a chontractwyr ofyn am ganiatâd y curadur, y tywysydd teithiau neu'r aelod o staff sy'n arwain y grŵp.

Wrth dynnu lluniau a ffilmio ar y safle, boed hynny yn ein horielau, ar yr ystad neu y tu ôl i'r llenni, efallai y bydd staff yn dod atoch ac yn gofyn i chi am ddibenion eich gweithgareddau. Mae Amgueddfa Cymru yn cadw'r hawl i ofyn i chi stopio os canfyddir eich bod yn torri'r polisi hwn.

3. Defnydd masnachol

Rydyn ni’n eich croesawu ac yn eich annog i rannu’ch delweddau ar eich sianeli cyfryngau cymdeithasol personol, fodd bynnag, ni ddylid defnyddio'r delweddau at unrhyw ddiben masnachol. Mae'r term masnachol yn golygu bod y defnydd er mantais fasnachol neu iawndal ariannol preifat. Mae enghreifftiau o ddefnydd masnachol yn cynnwys:

  • Hyrwyddo brandiau.
  • Postiadau sy'n cynhyrchu refeniw gan gynnwys hysbysebion wedi’u brandio neu ddolenni perthnasol y telir amdanyn nhw.
  • Sesiynau tynnu lluniau a ffilmio.

Rhaid i ymwelwyr, gwirfoddolwyr, ymchwilwyr, myfyrwyr a chontractwyr gael caniatâd ysgrifenedig cyn defnyddio delweddau neu ffilmiau mewn unrhyw rinwedd fasnachol ac mae angen clirio’r caniatâd cyn y gall unrhyw ffotograffiaeth ddigwydd.

4. Ffotograffwyr masnachol sy'n dymuno trefnu sesiynau ffotograffau ar ein safleoedd

Os hoffech chi gynnal sesiwn ffotograffiaeth neu ffilmio ar unrhyw un o'n safleoedd at unrhyw ddefnydd masnachol, fel tynnu lluniau priodas neu ar gyfer unrhyw ddigwyddiadau grŵp, rhaid gwneud trefniadau gyda'n tîm mewnol ymlaen llaw. Cysylltwch â llogi@amgueddfacymru.ac.uk

5. Gwirfoddolwyr, ymchwilwyr a myfyrwyr

Gall gwirfoddolwyr, ymchwilwyr a myfyrwyr dynnu lluniau fel rhan o'u gwaith. Rhaid dilyn yr holl delerau a nodir ym mhob adran uchod. Yn bwysicaf oll, mae hyn yn cynnwys ceisio caniatâd cyn tynnu lluniau mewn mannau nad ydyn nhw’n fannau cyhoeddus.

Hefyd, rhaid i wirfoddolwyr, ymchwilwyr a myfyrwyr gael caniatâd ysgrifenedig gan Amgueddfa Cymru cyn cyhoeddi unrhyw luniau maen nhw wedi'u cymryd o'n safleoedd neu o’n casgliadau.

Gall gwirfoddolwyr, ymchwilwyr a myfyrwyr ddefnyddio eu lluniau eu hunain yn eu traethodau, gwaith cwrs, adroddiadau neu arddangosfeydd ar yr amod bod y cyflwyniadau hyn yn rhan annatod o'r cwrs y maen nhw’n ei ddilyn ac nad ydyn nhw’n fasnachol.

Nid yw arddangosfeydd dilynol, erthyglau masnachol neu adroddiadau yn dod o dan ddefnydd personol a rhaid cael caniatâd pellach.

Ym mhob achos rhaid cydnabod Amgueddfa Cymru:

CYMRAEG: Trwy ganiatâd Amgueddfa Cymru
SAESNEG: By permission of Amgueddfa Cymru — Museum Wales

6. Cysylltu â ni

Ar gyfer ymholiadau gan y wasg ynghylch delweddau a ffilmio: cyfathrebu@amgueddfacymru.ac.uk

Ymholiadau ynghylch delweddau: delweddau@amgueddfacymru.ac.uk

  • Os hoffech gael lawrlwythiadau am ddim o ddelweddau digidol o lawer o eitemau yn ein casgliadau, gallwch ymweld â'n Llyfrgell Luniau ar-lein yn Delweddau Amgueddfa Cymru
  • I drwyddedu delweddau, gan gynnwys pob copi cydraniad uchel: delweddau@amgueddfacymru.ac.uk
  • Cedwir pob hawl gan Amgueddfa Cymru.