Mae corff marw Crist yn cael ei lusgo o’r groes, wedi’i boenydio a’i ddiosg o bob urddas. Mae ei fam yn estyn allan iddo’n llawn gwewyr tra bo Mair Magdalen yn cofleidio’i draed. Mae i’r braslun olew emosiwn dwys a phrysurdeb egnïol sy’n nodweddu peintiadau Baróc. Ganed Diepenbeck yn 's-Hertogenbosch a symudodd i Antwerp tua 1623. Cafodd Rubens, ei athro, ddylanwad mawr ar Diepenbeck, a byddai’n aml yn defnyddio’i fotiffau yn ei waith. Yma mae e wedi peintio yn arddull grisaille, sef arddull fonocromatig boblogaidd a ddefnyddiwyd yn aml i efelychu cerfluniau.