Mae'r cwcis hyn yn gwbl angenrheidiol ar gyfer weithrediad y wefan.
Rydym yn defnyddio Google Analytics i fesur sut ydych yn defnyddio'r wefan er mwyn i ni ei wella yn seiliedig ar angen defnyddwyr.
Gall y cwcis hyn gael eu gosod gan wefannau trydydd parti a gwneud pethau fel mesur sut rydych yn gwylio fideos YouTube.
Oherwydd y nifer uchel o geisiadau am fenthyciadau sydd wedi’u derbyn a’u cymeradwyo, ni fydd Amgueddfa Cymru yn gallu ystyried ceisiadau newydd am fenthyciadau gan leoliadau y tu allan i Gymru, o 1 Ebrill nes 31 Mawrth 2026.
Gan gadw mewn cof y rhybudd arferol o 12 mis ar gyfer benthyciadau rhyngwladol, a 9 mis ar gyfer benthyciadau i’r DU, bydd modd cyflwyno ceisiadau am fenthyciadau ar gyfer arddangosfeydd yn 2027 o 1 Ebrill 2026 ymlaen.
Byddwn yn parhau â phob cais am fenthyciad sydd wedi’i gymeradwyo yn barod. Byddwn yn dal i fod yn agored i geisiadau gan sefydliadau yng Nghymru.
Mae Amgueddfa Cymru’n annog y defnydd ehangaf posibl o wrthrychau ac eitemau o’i gasgliadau cyfoethog ac amrywiol, er mwyn ysbrydoli, cyffroi ac addysgu. Gweler manylion y casgliadau wrth glicio ar y botwm hyn:
Mae'r Amgueddfa'n hwyluso nifer o fenthyciadau bob blwyddyn, nid yn unig o fewn Cymru ond ledled y byd. Maent yn amrywio o fenthyciadau i amgueddfeydd cenedlaethol eraill yn y DG a phrif amgueddfeydd tramor eraill drwy arddangosfeydd teithiol, i fenthyciadau drwy ei chynlluniau Partneriaeth 'Cyfoeth Cymru Gyfan -Sharing Treasures' a 'Celf Cymru Gyfan - ArtShare Wales' ac i amgueddfeydd eraill ledled Cymru. Yn ystod y cyfnod rhwng Ebrill 2005 a Mawrth 2006 gwnaed 405 benthyciad gan yr Amgueddfa o fewn y DG yn unig, gan gynnwys 26,477 o wrthrychau ac eitemau i 253 o sefydliadau. Mae'r isod yn dangos ein hystod o ddarpariaeth benthyciadau ledled Cymru, sy’n cefnogi tua 134 o arddangosfeydd yn y lleoliadau hyn, gan gynnwys 3,135 o wrthrychau ac eitemau.
Mae’r Amgueddfa hefyd yn darparu benthyciadau ymchwil i sefydliadau ledled y byd, yn arbennig o’r casgliadau gwyddoniaeth naturiol; mae’r rhain yn tueddu i fod ar sail tymor hirach na’r rhai sy’n cael eu benthyg ar gyfer arddangosfeydd.
Mae hwyluso benthyciadau yn brif weithgaredd o fewn Amgueddfa Cymru, fel y disgrifiwyd yn
(copi caled ar gael drwy gais). Mae’r Amgueddfa hefyd wedi ymrwymo i wella’r broses o hwyluso benthyciadau i amgueddfeydd heb fod yn rhai cenedlaethol drwy ei Chynllun Partneriaeth, ond hefyd drwy fabwysiadu canllawiau a safonau a gyhoeddwyd gan y Gynhadledd Cyfarwyddwyr Amgueddfeydd Cenedlaethol yn ei ddogfen Cyfarwyddyd ynglŷn â threfnau benthyg rhwng amgueddfa genedlaethol ac amgueddfa anghenedlaethol.
Mae casgliad Amgueddfa Cymru yn perthyn i bawb yng Nghymru, ac rydyn ni am roi cyfle i gymaint o bobl â phosib i’w fwynhau. Un o’r ffyrdd o wneud hyn yw benthyg gwrthrychau i amgueddfeydd, orielau a chymunedau ledled Cymru, fel bod gan gynulleidfaoedd fynediad lleol at y casgliad.
Rydym hefyd eisiau sicrhau bod amgueddfeydd ac orielau y tu allan i Gymru yn gallu benthyg gweithiau i’w harddangos mewn arddangosfeydd newydd, cyffrous.
Rydym wedi adolygu ein ffordd o reoli benthyciadau, a’i symleiddio lle bo modd. Bydd yr wybodaeth isod yn eich tywys drwy’r gwahanol gamau ac yn esbonio beth sydd angen i chi ei wneud.
Os oes gennych ddiddordeb mewn benthyg rhywbeth gennym ni, mae’n syniad da i wneud rhywfaint o ymchwil cyn gwneud cais ffurfiol am fenthyciad.
Un adnodd defnyddiol yw’r
. Gallwch hefyd gysylltu â’r Cofrestrydd (benthyciadau@amgueddfacymru.ac.uk) neu’r adran guradurol berthnasol i drafod eich syniadau.
Pan fyddwch wedi penderfynu beth hoffech chi ei fenthyg, bydd angen i chi anfon cais ffurfiol dros e-bost neu trwy lythyr. Dylid cyfeirio’r cais at y Cyfarwyddwr Casgliadau ac Ymchwil (Dr Kath Davies) a’i anfon i: benthyciadau@amgueddfacymru.ac.uk
Anfonwch eich cais o leiaf naw mis cyn eich bod angen y gwrthrychau. Bydd ceisiadau ffurfiol a wneir o fewn chwe mis i fod angen y gwrthrychau yn cael eu hystyried mewn amgylchiadau eithriadol yn unig.
Y rheswm ein bod yn gofyn am eich cais mor bell ymlaen llaw yw i roi digon o amser i ni weithio gyda chi i ddatrys unrhyw broblemau allai godi. Rydym am wneud popeth a allwn i sicrhau y gall y benthyciad ddigwydd.
Pan fyddwch yn gwneud y cais, rhowch gymaint o wybodaeth â phosibl ynghylch pam eich bod eisiau benthyg gennym ni. Rydym yn argymell eich bod yn cynnwys:
Bydd Cofrestrydd yr Amgueddfa yn cydnabod eich cais o fewn deg diwrnod i ni ei dderbyn. Sylwer: nid yw hyn yn golygu ein bod wedi cytuno i’ch cais.
Bydd ceisiadau am eitemau o’n casgliadau archaeoleg, hanes, diwydiant a gwyddorau naturiol yn cael eu hystyried fel hyn:
Byddwn yn anfon llythyr i chi unwaith y byddwn wedi penderfynu. Bydd y llythyr yn nodi unrhyw ffioedd a chostau, ac unrhyw ofynion penodol sy’n berthnasol.
Byddwn yn gofyn i chi am wybodaeth fanwl ynghylch eich adeilad, sut ydych chi’n gofalu amdano ac unrhyw gasgliadau sydd ynddo (gofynion diogelwch), a sut ydych chi’n mesur, cofnodi a rheoli tymheredd, lleithder cymharol a golau (gofynion amgylcheddol). Byddwn yn anfon Adroddiad Cyfleusterau, Atodiad Diogelwch ac Atodiad Casys Arddangos UKRG, er mwyn i chi allu cofnodi hyn. Bydd hefyd angen i chi ddweud wrthym sut y caiff yr eitemau ar fenthyg eu hyswirio.
Unwaith y byddwch wedi anfon yr wybodaeth hon i ni, byddwn yn ei hadolygu a byddwn yn gweithio gyda chi i ddatrys unrhyw broblemau neu bryderon fel bod modd i’r benthyciad fynd yn ei flaen. Os na allwn ni ddatrys popeth, efallai y bydd angen i ni adolygu’r benthyciad a phenderfynu a oes modd benthyg y gwrthrychau i chi ai peidio.
Byddwn yn trafod ac yn cytuno â chi sut caiff y gwrthrychau eu pacio, eu cludo a’u gosod. Byddwn yn penderfynu a ddylai’r gwrthrych gael ei dywys yn gorfforol neu’n rhithiol gan aelod o’n staff (cluder) ai peidio, a byddwn yn gweithio gyda chi i drefnu hyn.
Yn olaf, byddwn yn anfon cytundeb benthyciad i chi, fydd yn cadarnhau’r holl drefniadau. Bydd angen i hwn gael ei lofnodi gan y Cyfarwyddwr Casgliadau ac Ymchwil a gan gynrychiolydd o’r sefydliad sy’n benthyg, cyn i’r gwrthrychau adael yr Amgueddfa.
Unwaith bydd y gwrthrychau wedi gadael yr Amgueddfa, byddwn yn anfon anfoneb i chi am y ffioedd a’r costau a gytunwyd.
Fel arfer nid ydym yn codi tâl ar gyfer benthyciadau yng Nghymru, gan fod rhannu’r casgliadau cenedlaethol gyda phobl Cymru yn rhan o nod yr Amgueddfa. Rydym yn codi ffi ar gyfer pob benthyciad y tu allan i Gymru. Rydym yn codi ffi uwch ar gyfer benthyciadau i arddangosfeydd lle codir tâl mynediad ar gyfer y sefydliad cyfan a/neu’r arddangosfa benodol. Mae manylion ein ffioedd presennol i’w gweld yma:
Yn ogystal ag unrhyw ffi, byddwn yn gofyn i chi dalu’r holl gostau uniongyrchol sy’n gysylltiedig â’r benthyciad. Mae’r rhain yn cynnwys, ond heb eu cyfyngu i: deunyddiau ar gyfer fframio, gwydro a mowntio; trafnidiaeth; ac yswiriant. Pe bai cais i fenthyg yn cael ei dynnu’n ôl, byddwn yn gofyn i chi dalu am unrhyw waith sydd wedi digwydd yn barod, neu unrhyw gostau a ysgwyddwyd gennym ni, ar bwynt canslo’r benthyciad.
Caiff cytundebau benthyg eu rhoi am gyfnod o 12 mis ar y mwyaf.
Os ydych chi am ymestyn y cyfnod benthyg, bydd angen i chi roi gwybod i Gofrestrydd yr Amgueddfa, un ai drwy lythyr neu e-bost o leiaf fis cyn dyddiad gorffen y cytundeb presennol. Byddwn yn cysylltu â chi cyn gynted â phosibl ar ôl derbyn eich cais i roi gwybod beth yw ein penderfyniad. Caiff yr holl ffioedd a chostau yn gysylltiedig ag adnewyddu eu cadarnhau pan gaiff y cais ei wneud.
Rydym yn cadw’r hawl i archwilio’r gwrthrychau sydd ar fenthyg o bryd i’w gilydd, er mwyn sicrhau eu bod yn derbyn y gofal priodol. Bydd hyn ar gost y benthycwr.
Er mwyn i ni allu datblygu a gwella ein gwasanaeth benthyg, byddwn yn gofyn i chi gwblhau ffurflen adborth.
Cyswllt: benthyciadau@amgueddfacymru.ac.uk
Os hoffech fenthyg gwrthrych at ddibenion heblaw am ei arddangos, yn enwedig ar gyfer gwaith ymchwil, cysylltwch â'r adran berthnasol i drafod eich anghenion. Bydd yr adran yn trafod yr amodau perthnasol â chi, er enghraifft amodau ar gyfer cymryd sampl, ac yn rhoi gwybod i chi am unrhyw gostau. Bydd gofyn i ymchwilwyr sy'n benthyg gwrthrych gennym am y tro cyntaf gofrestru fel Benthyciwr Cymeradwy.
