Mae'r cwcis hyn yn gwbl angenrheidiol ar gyfer weithrediad y wefan.
Rydym yn defnyddio Google Analytics i fesur sut ydych yn defnyddio'r wefan er mwyn i ni ei wella yn seiliedig ar angen defnyddwyr.
Gall y cwcis hyn gael eu gosod gan wefannau trydydd parti a gwneud pethau fel mesur sut rydych yn gwylio fideos YouTube.
Amgueddfa Cymru
Mae'r darlun ymddiddan hwn yn portreadu'r brodor o Tahiti, Mai (Omai), gyda Joseph Banks, a ddaeth yn Llywydd ar y Gymdeithas Frenhinol, a Daniel Solander, y botanegydd o Sweden a Cheidwad Hanes Natur yr Amgueddfa Brydeinig. Banks a Solander oedd naturiaethwyr blaenllaw'r cyfnod a aeth yn gwmni i'r Capten Cook ar ei daith arwrol gyntaf i Dde'r Môr Tawel ym 1768. Roedd Mai wedi teithio i Loegr ym 1773 ar long Capten Tobias Furneaux, yr 'Adventure', ar ôl dod i adnabod y criw. Rhoddwyd Mai i ofal Banks a Solander oherwydd eu bod wedi astudio ieithoedd a diwylliant Tahiti yn ystod eu taith i'r Môr Tawel. Daeth y dyn o Tahiti yn dipyn o seren ar y llwyfan gymdeithasol yn gyflym, wrth giniawa yn y Gymdeithas Frenhinol a chael ei gyflwyno i'r Brenin Siôr III. Tra bod Solander wedi ei bortreadu yn eistedd wrth ddesg, mae Banks yn y canol, yn sefyll, ac yn ystumio tuag at Mai, sydd mewn gwisg llaes gwyn. Mae Parry wedi dal naws gydweithredol ymchwil ddeallusol a gwyddonol y cyfnod yn y gwaith. Roedd yr artist yn ddisgybl i Syr Joshua Reynolds, ac mae ei ddylanwad yn amlwg yma. Mae'n bosibl y cafodd Parry'r cyfle i beintio Mai drwy ei feistr, am i Reynolds bortreadu'r dyn o Tahiti hefyd. Peintiodd Parry y portread grŵp hwn ar ôl iddo ddychwelyd o'r Eidal ym 1775.
Caiff Casgliadau Arlein ei ddiweddaru yn rheolaidd, ond gwnewch yn si’r bod eitem yn dal i gael ei arddangos cyn ymweld yn arbennig.
