Casgliadau Arlein

Gyda’u lliwiau cyfoethog a’r gwead arwyneb fel ffresgo mae’r llestri y mae Elizabeth Fritsch yn eu creu â llaw yn bleser i’w gweld a’u cyffwrdd. Gwrthrychau hynod gymhleth yw’r rhain fodd bynnag ac mae myrdd o ddiddordebau deallusol – o theori cerdd a mathemateg i lenyddiaeth, myth a daeareg – ynghudd yn y clai. Mae Fritsch hefyd yn chwarae â’r llygad wrth i ofod dychmygol y patrymau ar yr arwyneb ymateb i ofod real y gwrthrych 3D. Ymgorfforiad o awyr y nos yw’r grwnd glasddu yn Tân Gwyllt XII. Ymddengys fel petai gronynnau wedi’u gwasgaru a fflachiadau gwyn yn arnofio mewn gofod o fewn, neu tu hwnt i siâp y llestr, rhith sy’n dadffurfio arwyneb y llestr ac yn herio ein hymwybyddiaeth o realiti. Fritsch yw’r prif artist cerameg o dras Cymreig, ac wedi mynd ati yn nechrau’r 1970au i ailddiffinio rhychwant y mudiad cerameg crefft gellir dadlau taw hi yw crochenydd pwysicaf ei chenhedlaeth.