Casgliadau Arlein

Alfred Sisley oedd yr unig artist argraffiadol blaenllaw a baentiodd yng Nghymru. Fe deithiodd yma gyda’i bartner hirdymor, Eugénie Lescouezec – erbyn 1897 roedd iechyd y ddau yn dirywio, a daethant i Brydain i briodi’n dawel a chyfreithloni eu plant. Treuliodd y pâr yr haf yn ne Cymru, gan aros ym Mhenarth cyn mynd ar eu mis mêl i Fae Langland. Ym Mhenarth dyma nhw’n aros gyda masnachwraig glo o’r enw Mrs Thomas. Mewn llythyr at y beirniad Gustave Geffroy, dywedodd Sisley fod ‘y wlad yn brydferth a’r Ffyrdd, gyda’r llongau mawr yn hwilio i mewn ac allan o Gaerdydd, yn rhagorol’. Ond fe gwynai hefyd fod y gwelyau’n anghyffordus a’r tywydd yn rhy boeth! Cynhyrchodd Sisley chwe paentiad ar ei arhosiad byr ym Mhenarth, gan astudio gwahanol dywydd ac effeithiau golau tra’n gweithio ar sawl cynfas ar y tro. Paentiwyd yr olygfa hon o’r llwybr ar ben y clogwyn sy’n cysylltu Penarth a Larnog, lle profodd y dyfeisiwr Guglielmo Marconi y signal radio cyntaf ychydig fisoedd ynghynt. Yn ogystal ag esiampl o dirlun Cymru drwy lygaid Argraffiadwr, dyma un o’r morluniau prin gan Sisley sydd wedi goroesi, a’r olygfa gyntaf o Gymru ganddo i gael ei chaffael gan gasgliad cenedlaethol ym Mhrydain.