Digwyddiad:Dyfal Droi y Garreg: Cylch Darllen

Labeli, hunaniaeth, dad-drefedigaethu, hygyrchedd: mae yna lawer o wahanol arlliwiau i'r gweithiau celf a'r prosesau sy'n gysylltiedig â Dyfal Droi y Garreg. Ymunwch â ni i ddarllen a thrafod rhai o themâu'r project, yn rhan o gylch darllen tair rhan am ddim.

Bydd pob cylch darllen yn cael ei guradu gan artist, ymgyrchydd neu ddamcaniaethwr y mae ei waith ei hun yn cyd-fynd â themâu Dyfal Droi y Garreg. Byddant yn dewis testunau (rhyddiaith, barddoniaeth, theori, cerddoriaeth), y byddwn yn eu trafod a'u hystyried gyda'n gilydd. Does dim angen unrhyw brofiad blaenorol arnoch, dim ond chwilfrydedd. Ymunwch â ni!

Bydd sesiwn dydd Sul 2 Tachwedd yn cael ei chyd-guradu gan Taey Iohe, trwy lens eco-crip a ffeministiaeth gwiyr. Mae'r artist a’r awdur Taey Iohe yn eich gwahodd i ymuno â chylch o ddarllenwyr i ymgolli yng ngeiriau Vandana Shigh, Jackie Wang, a June Jordan er mwyn ystyried hanesion anorffenedig ac ymwneud gyda meddwl agored i gategoreiddio amgueddfaol a realiti byd-eang colled, salwch a chwymp ecolegol.

Bydd y sesiwn ar ddydd Sul 16 Tachwedd, Cyffwrdd Symud Dweud, yn cael ei chyd-guradu gan Kelly Lloyd, sydd wedi creu gwaith gyda Sophie sy'n rhan o'r arddangosfa. Gyda Kelly a Sophie, byddwn yn darllen ac yn meddwl gyda'n gilydd am naratif fel strategaeth sy'n dangos y cyfyngiadau ar gasgliadau hanesyddol. Byddwn yn darllen darnau o waith Saidiya Hartman a Katrina Palmer, a thestun Katherine Agyemaa Agard gydag Esyllt Angharad Lewis, sy'n rhan o arddangosfa Dyfal Droi y Garreg.

Bydd sesiwn mis Ionawr yn cael ei chyd-guradu gan Nat Raha, bardd ac ysgolhaig sy'n ymchwilio i drawsffeministiaeth.
 

Os oes gennych unrhyw ofynion mynediad, e-bostiwch Kate Breeze safbwyntiau@amgueddfacymru.ac.uk i drefnu cymorth – mae cyllideb benodol ar gael ar gyfer mynediad, a allai gynnwys teithio, gofalwyr, cyfieithu (gan gynnwys BSL), neu archebu cadeiriau olwyn ac ati. Mae'n bosibl y bydd angen i ni drafod eich anghenion mynediad er mwyn deall beth sy'n bosibl, ond ni fyddwn yn gofyn am 'dystiolaeth' ohonynt, rydym yn deall mai chi sy'n gwybod beth sydd ei angen arnoch i ymuno â ni.

Gwybodaeth

Lleoliadau - Amgueddfa Genedlaethol Caerdydd (Oriel 14)

mae dyddiad Ionawr yn dod cyn bo hir

Mae Sophie Mak-Schram yn ymgysylltu ag eraill mewn gwaith penodol i le mewn perthynas â grym, cydberchnogaeth, gwybodaeth a'r dyfodol. Mae'n gweithio gydag eraill, o ran ei dull a'i ffurf, ac yn tynnu ar arferion profiadol, artistig, dad-drefedigaethu ac ar y cyd er mwyn tynnu pobl at ei gilydd, ail-ddychmygu a dyfeisio. Mae Sophie yn tynnu ar ei phrofiadau personol a chyffredin o wahaniaethau diwylliannol, gwladychiaeth, hil a rhyw.

Mae'n aml yn defnyddio 'offeryn' fel trosiad barddonol a gwrthrych ymarferol i fynd i'r afael â beth rydyn ni'n ei wybod a sut, a pha ran ydyn ni'n ei chwarae yng nghysyniad pŵer a'r syniad o berthyn. Mae Sophie'n dod â phobl ynghyd, yn hwyluso, yn ysgrifennu, yn darllen, yn creu gwrthrychau a'u defnyddio i ddeall neu wrando.

Artist, awdur a gwrandäwr yw Taey Iohe, a anwyd ger afon Han ac sydd bellach yn byw rhwng afon Lea ac afon Ching. Mae eu gwaith yn llifo a phontio rhwng barddoniaeth, sain, ffilm, a phractis cymdeithasol, a'r cyfan wedi'i wreiddio mewn ymdeimlad eco-crip o berthyn. Maen nhw ar hyn o bryd yn artist-ymchwilydd gyda Making Time yn Artangel, yn edrych ar wahanol fathau o ollyngiad – o'r corff, o hanes, o ecoleg glwyfedig. 

Mae Kelly Lloyd yn artist ac addysgwr trawsddisgyblaethol sy'n canolbwyntio ar faterion cynrychiolaeth a chynhyrchu gwybodaeth ac yn blaenoriaethu ymchwil gydweithredol sy'n wynebu'r cyhoedd. Mae'n creu gosodiadau sy'n cyfuno testun, murluniau a gwrthrychau arwahanol, ac yn ysgrifennu traethodau y mae hi'n eu perfformio o bryd i'w gilydd. Yn y gosodiadau, paentiadau, cerfluniau, traethodau a darlithoedd hyn mae Lloyd yn ceisio creu perthnasoedd ffurf/cynnwys abswrd. Yn ddiweddar, mae wedi cynnal arddangosfeydd unigol yn Royal Academy Schools (Llundain), Crybaby (Berlin), Bill’s Auto (Chicago), Demo Room (Aarhus) a Dirty House (Llundain) – enillodd Wobr Art Licks Workweek ar gyfer yr arddangosfa hon.