Cwrs:Cwrs - Cyflwyniad i Gadw Gwenyn: Dechrau o'r Dechrau

Cwrs hamddenol, llawn hwyl i ddechreuwyr llwyr. Mae'n cyffwrdd ar bob elfen o gadw gwenyn, ac yn gyfle gwych i unrhyw un sydd am ddysgu mwy am y creaduriaid anhygoel hyn. Bydd pawb yn meithrin dealltwriaeth gadarn o sut i gadw gwenyn yn llwyddiannus, a mwynhau'r gwaith! 

**Manylion:** 

- Lleoliad: Amgueddfa Genedlaethol y Glannau, Abertawe 

- Dan ofal tiwtor cyfeillgar, hynod brofiadol: Alison Williams yw gwenynwraig yr Amgueddfa. Mae hi wedi bod yn gofalu am wenyn ers 10 mlynedd ac yn cadw cychod ei hun ar gyrion Penrhyn Gŵyr. 

- Awyrgylch anffurfiol, hamddenol.

- Sylw i bawb, gyda lle i uchafswm o 12 person. 

- Bydd siwtiau gwenyn a menig yn cael eu darparu, ac rydyn ni'n argymell gwisgo esgidiau cerdded neu wellingtons. 

- Oedran: ⁠16+ (rhaid i blant 16-18 fod yng nghwmni oedolyn sy'n cymryd rhan) 

- Mae'r cwrs yn hygyrch i bawb.

- Iaith: Cynhelir y cwrs yn newis iaith yr hwylusydd, sef Saesneg

- Darperir lluniaeth ysgafn. 

**Strwythur y Cwrs:** - Mae'r cwrs yn cynnwys cyfuniad o sesiynau dosbarth a gwaith ymarferol gyda'r gwenyn.

**Sesiwn y Bore:** 

Bydd y diwrnod yn dechrau gyda hanfodion cadw gwenyn gan gynnwys: cylch bywyd y gwenyn, rheolau'r gwenyndy, paratoi'r cwch, gofalu am offer, a dysgu mwy am ryfeddodau gwenyn a pheillio. 

**Sesiwn y Prynhawn:** 

Ar ôl cinio bydd cyfle i ymgolli yn suo'r gwenyn ymhlith y cychod ar y balconi, wrth fwynhau sesiwn ymarferol. Bydd hyn yn cynnwys gwisgo siwtiau gwenyn, cwrdd â'r gwenyn, ac agor y cychod er mwyn adnabod y gwahanol fathau o wenyn a deall eu rolau gwahanol. 

*Nid oes cinio yn rhan o bris y tocyn. Mae croeso i chi ddod â phecyn bwyd neu ymweld â'n bwytai a chaffis ar y safle.* ⁠

Mae'r telerau ac amodau ar gyfer ein cyrsiau ar gael i'ch ystyried fan hyn.