Hygyrchedd – Amgueddfa Genedlaethol y Glannau

Rydyn ni’n falch o fod yr amgueddfa gyntaf i ddod yn aelod o’r cynllun Mynediad Cenedlaethol, sef Hynt. P’un a ydych chi’n unigolyn neu’n sefydliad, gallwch chi gael tocynnau am ddim i ofalwyr a chymdeithion ar gyfer rhai o’n digwyddiadau a’n harddangosfeydd. 

Mae Hynt yn fenter Cyngor Celfyddydau Cymru a reolir gan Greu Cymru mewn partneriaeth â Diverse Cymru gallwch chi wneud cais i fod yn aelod ar wefan Hynt. 

Archebu tocyn gyda cherdyn Hynt

Pan fyddwch chi’n archebu eich tocyn gyda cherdyn Hynt, byddwn ni’n gofyn am eich rhif cyfeirnod Hynt unigryw. Gallwch chi archebu eich tocynnau gyda ni yn y ffyrdd canlynol:

• Wyneb yn wyneb yn Amgueddfa Genedlaethol Caerdydd – bydd ein Cynorthwywyr Amgueddfa cyfeillgar wrth y Dderbynfa yn hapus i’ch helpu chi.
• Neu ar-lein – cliciwch ar y ddolen hon i ddechrau arni. Os ydych chi wedi archebu gyda ni ar-lein gan ddefnyddio rhif cod bar Hynt dilys, bydd eich cyfrif Hynt yn cael ei ychwanegu at eich cyfrif Amgueddfa Cymru er eich hwylustod yn y dyfodol. Sylwch y gallai gymryd hyd at 24 awr i’ch aelodaeth Hynt gael ei hychwanegu at eich cyfrif ar-lein. 

Bydd tocynnau’n cael eu rhoi i ddeiliad y cerdyn, a bydd angen iddo gyflwyno ei gerdyn Hynt ffotograffig ym mhob arddangosfa neu ddigwyddiad y bydd yn ei fynychu. Bydd nifer y tocynnau Hynt sydd ar gael i'w harchebu ar-lein yn gyfyngedig, ac yn seiliedig ar y nifer a osodwyd gan Hynt yn ystod y broses ymgeisio. Gwnewch yn siŵr eich bod chi’n dewis y nifer briodol o docynnau ar gyfer holl aelodau eich grŵp.

Dolenni Sain

Mae dolenni sain wedi’u darparu wrth y Dderbynfa, yn y siop, ac wrth gownteri’r caffi. Mae’r holl ddolenni sain yn gweithredu ar y gosodiad ‘T’. Gosodwch eich cymorth clyw i’w actifadu.

Bagiau synhwyraidd

Mae nifer gyfyngedig o fagiau synhwyraidd ar gael i’w benthyg am ddim o’r Dderbynfa. Mae’r rhain yn ffordd ddifyr i helpu ymwelwyr i archwilio’r Amgueddfa. Mae’r bagiau yn cynnwys:
Clustffonau canslo sŵn 
Teganau fidget 
Tortsh 
Chwyddwydr 
Map Synhwyraidd

Map Synhwyraidd

Mae mapiau a bagiau synhwyraidd ar gael o’r Dderbynfa. Gallwch chi ddefnyddio’r map synhwyraidd i ddod o hyd i lefydd synhwyraidd yn yr Amgueddfa. Cofiwch, gan fod adeilad ac arddangosfeydd yr Amgueddfa yn newid yn rheolaidd, efallai na fydd rhannau o’r map yn gyfredol ar ddiwrnod eich ymweliad.

Mynedfa ac allanfa’r Amgueddfa

Mae tair mynedfa i’r Amgueddfa. Mae pob mynedfa yn arwain at y brif neuadd. Does dim grisiau, ac mae’r drysau’n awtomatig neu’n agor gyda botwm.

Dyma’r mynedfeydd:

• Mynedfa’r Dre (What3Words – anyone.simply.lions)
• Mynedfa’r Golofnres (What3Words – maple.tolls.neck)
• Mynedfa’r Marina (What3Words – behind.ship.prices)

Oriau tawel

Ymunwch â ni ar gyfer ein hawr dawel hamddenol fisol, sy’n cael ei chynnal bob amser ar ddydd Sul am 3-4pm ar gyfer unrhyw un a fyddai’n gwerthfawrogi ymweliad mwy llonydd â’r Amgueddfa. Am ragor o wybodaeth a manylion am ein hawr dawel hamddenol nesaf, edrychwch ar ein dudalen Digwyddiadau.

Er mwyn eich helpu chi i gynllunio eich ymweliad, cymerwch gip ar ein stori weledol. Mae’n cynnwys ffotograffau a gwybodaeth i ddangos beth allwch chi ei ddisgwyl o’ch ymweliad â’r Amgueddfa.

Adegau Tawel  

Gall yr Amgueddfa fod yn brysur iawn ac yn swnllyd weithiau. Yr adeg dawelaf i ymweld â’r Amgueddfa yw 3pm ymlaen, fel arfer. Mae ein holl orielau yn cau am 4.45pm ac mae’r Amgueddfa yn cau am 5pm.

Ardaloedd tawel  

Mae ystafell dawel ar gael i’w defnyddio ar y llawr gwaelod wrth y lifftiau yn y brif neuadd. Mae’r ystafell hon ar gael i ymwelwyr a hoffai dreulio ychydig o amser tawel i ffwrdd o’r orielau.

Mae ardal ddarllen/eistedd gyfforddus ar y llawr cyntaf hefyd yn yr Oriel Cyflawnwyr.

Goleuadau a thymheredd 

Mae’r Amgueddfa yn defnyddio golau a sain i adrodd straeon. Bydd golau a lliwiau gwahanol ym mhob oriel. 

Mae’r tymheredd yn amrywio wrth i chi symud trwy’r Amgueddfa ac mae rhai orielau a gofodau yn eithaf oer. Efallai hoffech chi ddod â dilledyn ychwanegol gyda chi i’w wisgo yn yr ardaloedd hyn.

Llawr anwastad 

Sylwch fod y llawr yn anwastad y tu allan yng ngardd GRAFT; byddwch yn ofalus yn yr ardaloedd hyn.

Benthyg cadair olwyn 

Mae cadeiriau olwyn ar gael i’w benthyg o’r Dderbynfa ar gais. Mae’r rhain yn cael eu dyrannu ar sail y cyntaf i’r felin. Yn anffodus, allwn ni ddim darparu cymorth staff o amgylch yr Amgueddfa ar gyfer defnyddwyr cadair olwyn. Allwch chi ddim mynd â chadeiriau olwyn allan o’r Amgueddfa.

Sgwteri symudedd 

Mae croeso i chi ddefnyddio sgwteri symudedd yn yr Amgueddfa.

Clirio’r safle mewn argyfwng  

Mae’n annhebygol y bydd larwm yn canu yn ystod eich ymweliad. Os bydd un yn canu, peidiwch â phoeni – dilynwch unrhyw gyfarwyddiadau gan aelodau staff, a fydd yn eich tywys chi i’r allanfa ddiogel agosaf. Mae larymau tân gweledol gyda goleuadau sy’n fflachio yn gweithredu hefyd.

Lifft a mynediad i’r orielau  

Mae’r rhan fwyaf o’r lifftiau yn yr Amgueddfa yn addas i gadeiriau olwyn a sgwteri symudedd ac maen nhw’n defnyddio cyhoeddiadau sain. I weld lleoliadau’r holl lifftiau, edrychwch ar ein map o’r Amgueddfa. Mae arwyddion sy’n nodi ble mae pob lifft a sut mae’n gweithio. Bydd staff yr Amgueddfa wrth law i helpu.

Llawr Gwaelod       
Derbynfa        
Y Brif Neuadd         
Siop yr Amgueddfa        
Caffi’r Amgueddfa        
Ystafell Dawel        
Oriel Newydd         
Oriel Gwnaed yng Nghymru         
Oriel y Golofnres         
Gardd GRAFT        
Toiledau Hygyrch        
Lleoedd Newid       
Llawr Cyntaf        
Oriel y Wal Goch       
Oriel y Wal Wen  
Oriel y Warws  
Oriel Cyflawnwyr  
Cornel Ddarllen  
Ardal Chwarae  
Toiledau Hygyrch

Os hoffech chi logi rhai o’n gofodau ar gyfer digwyddiad arbennig neu breifat, edrychwch ar ein tudalennau Llogi Lleoliad am ragor o wybodaeth.

Toiledau Hygyrch

Mae toiledau ar y llawr gwaelod a’r llawr cyntaf. Mae toiledau hygyrch ar y ddau lawr yn yr un mannau. Mae drysau’r toiledau a’r sychwyr dwylo yn swnllyd yn yr ardaloedd hyn.

Mae toiledau’r llawr gwaelod wrth ymyl y caffi. Mae mwy o doiledau yn yr Oriel Cyflawnwyr, ar y llawr cyntaf.

Cyfleusterau newid cewynnau

Mae cyfleusterau newid cewynnau ar gael ar y llawr gwaelod a’r llawr cyntaf, wrth ymyl y toiledau.  

Lleoedd Newid

Yn ogystal â’n toiledau hygyrch, mae gennym ni gyfleusterau Lleoedd Newid ar y llawr gwaelod nesaf at yr Oriel Rhwydweithiau, ar bwys y grisiau. Mae ein Lle Newid yn cynnwys cawod, sinc sy’n codi a gostwng, gwely a chyfleusterau ar gyfer offer codi. Gofynnwch am allwedd Radar wrth y Dderbynfa yn y brif neuadd.

Dewch o hyd i Leoedd Newid eraill. Toiledau Lleoedd Newid (changing-places.org)  

Seddi

Mae rhai seddi yn rhai o’r orielau a gofodau cyhoeddus, yn y caffi ac yng ngardd GRAFT.  

Mae croeso i chi ddefnyddio ffyn cerdded neu stolion plygu â sedd, cyn belled â bod gorchuddion rwber ar y gwaelod.

Seiniau Cyfoethog

Bydd seiniau diwydiannol, pobl yn siarad a mwy yn rhai o’n horielau. Cadwch lygad am y symbolau llygad a thrwyn yn y stori weledol ar gyfer yr holl leoliadau hyn.

Cŵn gwasanaeth

Rydyn ni’n deall y bydd angen i rai o’n hymwelwyr gael cymorth ci gwasanaeth ac rydyn ni’n falch o groesawu cŵn gwasanaeth sydd wedi’u hyfforddi’n briodol. Dylai cŵn gwasanaeth gael eu goruchwylio a’u cadw dan eich rheolaeth drwy gydol eich ymweliad, gan aros ar dennyn a gwisgo’r tabard neu’r harnais priodol, yn ddelfrydol. Gofynnwch i aelod o staff eich cyfeirio at y toiled/ardal mynd i’r toiled agosaf. Mae dŵr yfed ar gael ar gais o’r caffi.