Amgueddfa Genedlaethol Caerdydd
Ymweld Beth Sydd Yma Digwyddiadau Dysgu

Crefftwaith Cyfoes

Cerflun serameg gwyn o gorff dynol mewn hyd tri chwarter wedi'i osod ar blinth, gydag addurniadau blodau glas ger y gwaelod.

Claire Curneen, Cyfres Las, 2002 (NMW A 36419). © Claire Curneen/ Amgueddfa Cymru.

Powlen seramig wedi’i gwneud â llaw â gwydredd llwyd-gwyn a phatrwm rheiddiol brith tywyll, ar ogwydd ar arwyneb gwastad.

Lucie Rie, Powlen wedi'i Gwau, ca. 1980 (NMW A(L) 2176). © Ystâd yr artist/Ymddiriedolaeth Derek Williams/Amgueddfa Cymru.

Mae’r Amgueddfa yn casglu enghreifftiau o grefft gyfoes ers 1924 gan gynnwys crochenwaith, gwydr, arian, jâd, tecstilau, pren a mwy.

Mae’r Amgueddfa wedi datblygu casgliad cynrychioliadol o grochenwaith stiwdio clasurol yr ugeinfed ganrif gan bobl fel Bernard Leach, Michael Cardew, Lucie Rie a Hans Coper.

Mae’r casgliad yn dal eiliadau o’r sîn grefftau fywiog yng Nghymru, gyda chrochenwaith gan artistiaid o Gymru fel Walter Keeler, Morgen Hall, Michael Flynn a Pamela Rawnsley, ac artistiaid o dramor sydd wedi dewis sefydlu eu hymarfer yma yng Nghymru, er enghraifft Jin Eui Kim, Junko Mori, Yusuke Yamamoto a Claire Curneen.

Y tu hwnt i’n ffiniau mae’r casgliad hefyd yn adlewyrchu byd ehangach crefft gyfoes gan gynnwys gweithiau gan Edmund de Waal, Julian Stair, Carol McNicoll, Betty Woodman a Claudi Casanovas.

Mae partneriaid fel Ymddiriedolaeth P&O Makower, sy’n comisiynu gwneuthurwyr arian ar ddechrau eu gyrfa, ac Ymddiriedolaeth Derek Williams, sy’n casglu celf gyfoes, yn rhoi eu casgliadau eu hunain ar fenthyg yn hirdymor i Amgueddfa Cymru i rannu a hyrwyddo pwysigrwydd crefft gyfoes.