Nosweithiau Lansio a Gwobrwyo

P'un ai'ch bod chi'n bwriadu cynnal noson wobrwyo, digwyddiad lansio neu achlysur untro, mae Amgueddfa Genedlaethol Caerdydd yn cynnig lleoliad unigryw yng nghalon y brifddinas.

Go brin y cewch chi le mwy mawreddog na'n Neuadd Fawr eiconig. Mae modd addasu'r lleoliad ar gyfer hyd at 400 o bobl ar eu traed, neu rhwng 280 a 300 mewn amrywiol drefniadau eistedd, gyda grisiau marmor godidog a nenfwd dan gromen osgeiddig. Mae'r neuadd yn gwbl addas i osod llwyfan ac ar gyfer cyflwyniadau. Mae'n gwbl hygyrch diolch i ramp drwy’r prif ddrysau a lifftiau i bob lefel, gan gynnwys y tai bach.

Mae ein horielau trawiadol, sy'n gartref i un o'r casgliadau gorau o gelf argraffiadol yn Ewrop, yn gefndir heb ei ail hefyd ar gyfer achlysuron a seremonïau mwy agos atoch neu ar gyfer derbyniad diodydd wrth gyrraedd.

Mae darlithfa hyfryd Reardon Smith, sy’n adeilad rhestredig Gradd I unigryw, yn opsiwn perffaith arall i gynnal seremoni wobrwyo. Ac wedyn, beth am dderbyniad ar ôl y seremoni yn ein Neuadd Fawr neu Orielau.

Siaradwch â'n tîm ynghylch creu noson gwbl unigryw i chi, boed yn oleuadau lliw brand, cymorth technegol neu addurno'r ystafell mewn modd arbennig, a holwch fwy am ddewisiadau arlwyo.

Ar gyfer adloniant ysblennydd gallwn gynnal perfformiadau gan ddawnswyr, corau, artistiaid clasurol, bandiau a mwy. Siaradwch â'n tîm arbenigol am argymhellion.

O ran llety mae gan Gaerdydd ddigon o westai i ddewis o’u plith ar gyfer eich gwesteion, ond mae gan Amgueddfa Genedlaethol Caerdydd gynnig arbennig gyda Gwesty Clayton sy’n rhoi gostyngiad o 15% ar gyfraddau llety i gynrychiolwyr wrth archebu gan ddefnyddio ein dolen cleientiaid y gallwn ei rhannu unwaith y bydd eich digwyddiad wedi’i gadarnhau gyda ni.

Lleoliad unigryw – mae prisiau llogi’n dechrau o £2,800 + TAW yn dibynnu ar le. Mae pecynnau arlwyo’n cael eu gwerthu ar wahân.