Digwyddiad:Datganiad ar yr Organ

Ymunwch â ni am 1pm ar ddydd Gwener 31 Ionawr, am gyngerdd mewn cyfres o ddatganiadau ar yr organ hanesyddol Williams-Wynn Wynnstay o'r 18fed ganrif.

Mae Robert Court wedi dilyn gyrfa hynod o amrywiol a phrysur, gyrfa sydd wedi rhychwantu 40 mlynedd a mwy ac sydd wedi mynd ag ef ar draws y wlad benbaladr ac i Ewrop ac UDA. Mae wedi cyfeilio gyda llawer o brif gerddorfeydd y wlad hon, ac wedi darlledu’n aml ar deledu a radio. Mae'n canu'r organ, y piano a'r harpsicord – a dweud y gwir, unrhyw beth a chanddo allweddell! Un o'r offerynnau mwy anarferol y mae Robert yn ei ganu yw'r harmoniwm – yn 2013 roedd yn unawdydd ar drac sain y ffilm Y Syrcas, ac yn 2015 canodd yr harmoniwm ar drac sain ffilm S4C, Dan y Wenallt. Yn fwy diweddar, bu Robert yn gweithredu'n rôl ymgynghorydd cerdd ar gyfer gosodiad yr artist o Wlad yr Iâ, Ragnar Kjartansson, sef “Il Cielo yn Una Stanza”, gosodiad a fu’n rhedeg am bum wythnos yn Amgueddfa Cymru, gan gasglu adolygiadau 5 seren yn y wasg genedlaethol. Yn 1978, cydsefydlodd Cardiff Organ Events, cwmni sy’n gyfrifol am drefnu mwy na 30 o ddatganiadau organ bob blwyddyn yng Nghaerdydd a’r cyffiniau, ac sy’n hyrwyddo gwaith adnewyddu offerynnau lleol o bwys hanesyddol, ynghyd â chynghori ar hynny. Rhwng 1998 a 2010, Robert oedd cyfarwyddwr Côr Siambr Cantemus Cymru. Mae addysgu'n rhan bwysig o fywyd cerddorol Robert – am flynyddoedd lawer bu'n Diwtor Organ ac yn Ddarlithydd Cyswllt ym Mhrifysgol Caerdydd, ac yn 2008 fe'i penodwyd yn ddeiliad cyntaf swydd Organydd Prifysgol Caerdydd. Robert yw organydd a chôr-feistr Eglwys St Awstin ym Mhenarth, ac mae'n ddeiliad Gwobr Archesgob Cymru am Wasanaethau i Gerddoriaeth Eglwysig.

Gan fod llefydd yn gyfyngedig yn yr oriel, bydd archebu ymlaen llaw yn hanfodol. 

TOCYNNAU

Noddir gan Gyfeillion Amgueddfa Cymru.