Palaeontoleg

Mae ffosilau yn cofnodi esblygiad bywyd ar y Ddaear, ymateb bywyd i newid yn yr hinsawdd a lefel y môr, a sut mae wedi newid yr amgylchfyd. Mae gan Amgueddfa Cymru arddangosiadau gwych o ddeinosoriaid, ymlusgiaid morol, amonitau, planhigion corsydd glo a trilobitau, ac yn ein storfeydd mae un o gasgliadau mwyaf y DU o ffosilau yn cofnodi bywyd yn y gorffennol.

Casgliadau

Mae'r casgliad Palaeontoleg yn gryf ym meysydd:

• Brachiopodau a trilobitau Palaeosoig o bedwar ban byd
• Amonitau a deufalfiau Prydain y cyfnod Mesosoig
• Planhigion Silwraidd, Defonaidd a Carbonifferaidd Prydain
• Y casgliad o deipiau sydd wedi'u darlunio a'u dyfynnu

Mae gennym nifer o gasgliadau pwysig gan unigolion:

• Mae casgliad trilobitau Sheldon, casgliad foraminifera Pearson ac Ezard a casgliad deufalfiau Trueman ill tri yn rhoi tystiolaeth o esblygiad a newid graddol mewn ffurf dros filiynau o flynyddoedd
• Casgliad amonitau Jwrasig J.F. Jackson a gasglwyd ar arfordir Dorset yn y 1960au, a chasgliad Martin Foster
• Casgliad David Davies o blanhigion ffosil o lofeydd gweithiol sy'n cynnwys dros 16,000 o sbesimenau
• Casgliad Brachiopodau Mesosoig Prydain Derek Ager
• Rydym hefyd yn gofalu am Gasgliad Ymlusgiaid Morol Jwrasig Moore ar ran y perchnogion, Sefydliad Llenyddol a Gwyddonol Brenhinol Caerfaddon.

Ymchwil

• Systemateg, tacsonomeg, bioddaearyddiaeth, biostratigraffeg ac ecoleg anifeiliaid Palaeosoig mewn bryosoaid, trilobitau a brachiopodau penodol
• Anifeiliaid a stratigraffeg de Cymru
• Dadansoddiad geogemegol o ffosilau carbonad a sut y gall y dechneg ateb cwestiynau ar hinsawdd y ddaear yn ei hanes dwfn
• Palaeofotaneg – datgelu patrymau o ddifodiant mawr a newid hinsawdd yn hanes dwfn y ddaear.

Palaeontology