Gŵyl Fwyd Sain Ffagan - Newyddion Diweddaraf

Mae Gŵyl Fwyd Sain Ffagan ar y gweill! Ymunwch a ni ar 12 a 13 Medi am benwythnos o weithgareddau bwyd, arddangosiadau coginio, danteithion blasus a cherddoriaeth fyw gan rai o gynhyrchwyr gorau Cymru.

I wneud y gorau o’ch ymweliad, cymerwch olwg ar fap yr ŵyl a’r rhaglen am fanylion am yr holl weithgareddau gallwch gymryd rhan ynddynt. 

Dyma ambell i beth na ddylech chi eu colli. 

Opsiynau Bwyd 
Gyda dros 60 stondin bwyd a diod, bydd rhywbeth at ddant pawb, gan gynnwys digonedd o opsiynau fegan a ‘rhydd rhag’.  Bydd pob stondin yn cynnig pryd o fwyd am £7 eleni felly bydd digon o opsiynau fforddiadwy. 
Cymerwch olwg ar y rhestr lawn o stondinau bwyd.

Cymdeithas Lysiau Genedlaethol
Rydym wrth ein bodd yn cynnal Pencampwriaeth ysblennydd y Gymdeithas Lysiau Cenedlaethol, fel rhan o Ŵyl Fwyd Sain Ffagan eleni eto.

Edrychwn ymlaen at groesawu arddangoswyr o bob rhan o'r DU i Gaerdydd. Gan ein bod wedi croesawu Pencampwriaethau Cangen Cymru i'r Ŵyl ers blynyddoedd lawer, rydym yn arbennig o falch o gael ein dewis fel lleoliad ar gyfer Pencampwriaethau'r DU, sy'n cael eu cynnal yng Nghymru eleni.

Dyma gyfle i weld y grefft o dyfu llysiau ar ei gorau – gallech ei galw yn gelfyddyd hyd yn oed. Dewch i weld un o draddodiadau garddwriaethol gorau Prydain, a chael ysbrydoliaeth i ddechrau tyfu yn yr ardd.

Adloniant Bloedd 

Mae Bloedd yn curadu rhaglen fywiog o adloniant a phrofiadau cyfranogol unwaith eto eleni. O gerddoriaeth fyw a theatr, i faddonau sain ymlaciol a chyfleoedd i ganu ar y cyd, gallwch ddisgwyl perfformiadau yn ymddangos mewn amryw leoliadau ledled safle'r ŵyl dros y penwythnos.

Mae rhaglen adloniant yr ŵyl eleni'n archwilio sut mae afonydd Cymru wedi cysylltu cymunedau ers amser maith, wedi llunio traddodiadau bwyd, ac wedi cario straeon ar draws Cymru a thu hwnt.

Ardal Bwyd Da Caerdydd

Bydd Ardal Bwyd Da Caerdydd yn dathlu enwi Caerdydd yn un o ddinasoedd bwyd mwyaf cynaliadwy’r DU. Ymunwch â gweithgareddau hwyliog i’r teulu cyfan i ddysgu am fwyd sy’n dda i bobl a’r blaned. Bydd y babell yn cynnwys gweithdai ysbrydoledig, arddangosiadau, sgyrsiau a gweithgareddau yn dathlu bwyd lleol.
Ewch i’r rhaglen lawn am ragor o wybodaeth. 

Iaith Arwyddion Prydain (BSL)

Bydd gwasanaeth cyfieithu ar y pryd Iaith Arwyddion Prydain (British Sign Language / BSL) ar gael yn y digwyddiad eto eleni. 

Mae cyfieithwyr ar y pryd symudol ar gael yn y digwyddiad i dywys ymwelwyr B/byddar o amgylch yr ŵyl, mynychu gweithdai gyda nhw, ac i'w helpu i archebu bwyd a diod. 

Bydd rhai gweithgareddau’n cael eu harwain gan hwyluswyr byddar – gan gynnwys amser stori a gweithdai crefft.

Bydd yr athro Iaith Arwyddion Prydain, Ben Cullen, yn arwain sesiynau byr, hwyliog a rhyngweithiol i bobl o bob oed sydd eisiau dysgu rhywfaint o Iaith Arwyddion Prydain. Bydd y sesiynau hyn yn rhoi cyflwyniad croesawgar i Iaith Arwyddion Prydain ac yn annog mwy o bobl i gysylltu â diwylliant a chyfathrebu'r Byddar.