Arddangosfa:Ffasiwn

Mae arddangosfa Ffasiwn yn seiliedig ar It’s Called Ffasiwn, project ffotograffiaeth ffasiwn gwrth elitaidd sydd â’i wreiddiau yn y gymdeithas. Cafodd ei greu trwy gydweithio hirdymor gyda phobl ifanc ar draws cymoedd de Cymru.  
 

Dros ddeg mlynedd, mae’r project wedi cyfuno steil â ffotograffiaeth ddogfennol gan herio’r syniadau am bwy sy’n cael bod yn rhan o fyd ffasiwn a sut mae cymunedau’n cael eu portreadu. Yn hytrach na thynnu lluniau sy’n bortreadau disgrifiadol yn unig, mae’r broses o greu wedi datblygu dros gyfnod hir gyda’r bobl ifanc yn bartneriaid creadigol drwyddi draw.

Calon y project yw creu a’r grym i greu. Yn hytrach na bod yn symbol o berthyn i ddiwydiant penodol neu yn arwydd o statws, daw ffotograffiaeth, steilio a pherfformio yn offer ar gyfer arbrofi, hunan-fynegiant a hyder. Mae gwreiddiau’r lluniau yn y llefydd cyfarwydd a phrofiadau bob dydd, ac wedi’u hysbrydoli gan leisiau’r rhai sy’n cymryd rhan.

Mae’r arddangosfa’n gwrthod nostalgia ac ystrydebau ac yn creu lle i greadigrwydd, hiwmor ac uchelgais y bobl ifanc a’u cymunedau – mae’r lluniau’n ddrych o’u egni a’u dychymyg. Does dim awydd nac ymgais chwaith i weddnewid y llefydd yma chwaith,  y nod yw dathlu a dangos creadigrwydd y Cymoedd.

Drwy gyfuno ffotograffiaeth steil a dogfennol, mae Ffasiwn yn cynnig ffordd gyfoes o weld Cymru trwy lygaid ei chymunedau. Mae’n gyfle i fwynhau ffotograffiaeth a ffasiwn fel ffordd o fyw a chyd-greu — lluniau wedi’u creu gan bobl go iawn yn eu milltir sgwâr a thrwy eu llygaid nhw. 
 

Am ddim i Aelodau! 

Ymunwch â ni heddiw i fwynhau cynigion a buddion arbennig, gan gynnwys mynediad am ddim a diderfyn i'n harddangosfeydd â thâl.

Mae eich ymweliad yn ein helpu i wneud mwy.

Pan fyddwch chi'n prynu'ch tocyn, gallwch ddewis ychwanegu rhodd fach, wirfoddol. Mae pob cyfraniad bach a mawr yn ein helpu i ofalu am y casgliad cenedlaethol, creu arddangosfeydd ysbrydoledig, a chefnogi'r gwaith o rannu straeon Cymru heddiw.

Bydd ychwanegu rhodd o 10% o bris y tocyn neu fwy yn golygu y gallwn hawlio Cymorth Rhodd ar bris llawn y tocyn. Rydyn ni'n elusen, ac mae eich cefnogaeth wir yn gwneud gwahaniaeth. Diolch.