Digwyddiad:Sinema Amgueddfa

Mae Amgueddfa Cymru yn eich gwahodd i gyfres o ffilmiau unigryw a chyfareddol o oes aur y sinema!

Ymgollwch mewn profiad sinematig o’r oes a fu yn Amgueddfa Genedlaethol Caerdydd, wrth i ddarlithfa hanesyddol Reardon Smith gael ei thrawsnewid yn lleoliad o oes aur byd y ffilmiau ar gyfer noson allan cwbl unigryw.

Mae Sinema Amgueddfa yn fwy na dim ond gwylio ffilm - mae’n cyfuno sinema eiconig â pherfformiad byw, naws arbennig ac atgofion lu o’r oes a fu. Ar ôl cyrraedd, cewch eich croesawu gan dywyswyr Kitsch & Sync Collective a’ch tywys i fwynhau noson o ffilmiau clasurol, adloniant ac adrodd straeon heb ei ail.

Yn ystod Calan Gaeaf eleni, gall selogion y sgrin fawr fwynhau dwy o ffilmiau iasol mwyaf dylanwadol Alfred Hitchock, un ar ôl y llall – ‘The Birds’ a ‘Psycho’ – cyn cyflwyno’r clasur Nadoligaidd ‘Miracle on 34th Street’ ar gyfer tymor yr ŵyl, ac yna chwibanu drwy gerddoriaeth hudol ‘Singin’ in the Rain’ i groesawu 2027.

Felly beth allwch chi ei ddisgwyl?

• Cewch eich tywys i’r sinema gan dywyswyr Kitsch & Sync Collective, gyda’u perfformiad gwych yn siŵr o’ch diddanu cyn y sioe wrth iddyn nhw eich hebrwng i’ch sedd!
• Gwledd heb ei hail o oes aur y sgrin arian, gyda detholiad o ffilmiau byrion
• Rhywbeth at ddant pawb gyda phopcorn, melysion a diodydd o’n bar gwib.
• Theatr wedi’i thrawsnewid: o gerddoriaeth nodweddiadol o’r cyfnod i ddelweddau o’r amgueddfa yn ei hanterth

Os ydych chi’n chwilio am brofiad sinematig a noson llawn hud yng nghwmni ffrindiau, neu’ch bod yn awyddus i roi cynnig ar rywbeth mymryn yn wahanol yn ystod yr hydref a’r gaeaf, rydych chi’n siŵr o gael noson i’r brenin, gan fwynhau ffilmiau oesol ar y sgrin fawr mewn ffordd cwbl unigryw. Byddwn yn dangos:

31 Hydref 2026 | The Birds & Psycho (15)     
13 Rhagfyr 2026 | Miracle on 34th Street (U)     
27 Chwefror 2027 | Singin’ in the Rain (U)

Gwybodaeth Ychwanegol:

• Mae Darlithfa Reardon Smith wedi’i lleoli yng nghefn Amgueddfa Genedlaethol Caerdydd. Mae’r manylion llawn, gan gynnwys gwybodaeth lleoliad a hygyrchedd, ar gael yma.
• Bydd drysau’r theatr yn agor 30 munud cyn i’r ffilmiau ddechrau.
• Bydd y ffilmiau’n cael eu dangos gyda chapsiynau Saesneg.
• Mae hwn yn ddigwyddiad eistedd i lawr. Gwnewch yn siŵr eich bod chi’n prynu tocyn i bob person sy’n mynychu.
• Rhaid i unrhyw blant sy’n mynychu fod yng nghwmni deiliad tocyn sy’n oedolyn.
• Ni ellir ad-dalu tocynnau ac ni ellir eu cyfnewid am ddyddiad neu ddigwyddiad arall. Gwnewch yn siŵr eich bod yn gwbl hapus â’ch dewisiadau cyn archebu.

Rydyn ni wedi ymrwymo i wneud ein digwyddiadau yn fwy hygyrch i bawb. Rhowch wybod os oes gennych chi unrhyw anghenion mynediad ychwanegol. Am ragor o wybodaeth am gyrraedd yr Amgueddfa, ewch i: Hygyrchedd – Amgueddfa Genedlaethol Caerdydd | Amgueddfa Cymru